सिन्धुपाल्चोक (हाम्रो खेलकुद) – फ्रिडम कायक एण्ड र्‍याफ्टिङ स्कुल र ह्वाइट वाटर सातौं र्‍याफ्टिङ च्याम्पियनसिप तथा ११औं कायाक स्ललोम च्याम्पियनसिपमा च्याम्पियन बनेका छन् । फ्रिडम महिलातर्फ तथा ह्वाइट वाटर पुरुषतर्फ च्याम्पियन बनेको हो ।

सिन्धुपाल्चोकको सुकुटेविचस्थित सुनकोशी नदीमा तीन दिनसम्म चलेको प्रतियोगितामा स्ललोम विधाको पुरुषतर्फ ह्वाइट वाटर नेपाल पहिलो हुँदा पेडल नेपाल ‘बी’ दोस्रो तथा पेडल नेपाल पोखरा ‘ए’ तेस्रो भएको छ ।

मेन्स हेड टु हेडमा ह्वाइट वाटर नेपाल पहिलो, नेपाल कायाक क्लब काठमाडौं दोस्रो तथा पेडल नेपाल पोखरा ए तेस्रो भएको छ । डाउन रिभर रेस पुरुषमा ह्वाइट वाटर नै पहिलो हुन सफल भएको छ । नेपाल कायक क्लब दोस्रो तथा त्रिभुवन आर्मी क्लब ‘ए’ तेस्रो भएको छ । स्प्रिन्ट पुरुषतर्फ ह्वाइट वाटर टिम नै पहिलो भएको छ ।

कायक स्ललोम महिलतर्फ सुधा राई पहिलो र सुष्मा कठेत दोस्रो भएको छ । यस विधामा दुई खेलाडीको मात्रै सहभागिता रहेको थियो । ओभर एल रेस महिलामा फ्रिडम कायक एन्ड र्‍याफ्टिङ स्कुल बी पहिलो भोटेकोसी एड्भेन्चर क्लब दोस्रो तथा फ्रिडम कायक एन्ड र्‍याफ्टिङ स्कुल ए तेस्रो भएको छ । समग्रमा ह्वाइट वाटर नेपाल राष्ट्रिय च्याम्पियन बन्न सफल भएको छ ।

हरेक इभेन्टसमा पहिलो दोस्रो र तेस्रो स्थान हात पार्ने खेलाडीले क्रमश १५ हजार, १० हजार र ५ हजार रुपैैयाँ प्राप्त गरेको छ । विजयी टोली तथा खेलाडीलाई नेपाल र्‍याफ्टिङ तथा क्यानोइङ संघका कार्यवाहक अध्यक्ष राजिव श्रेष्ठले पुरस्कृत गरे ।

एसियाली ¥याफ्टिङ तथा क्यानोइङ महासंघका अध्यक्ष शौतक सिकन्डले प्रतियोगितामा शीर्ष स्थानमा रहने महिला र पुरुषका दुई टोलीलाई आगामी सेप्टेम्वरमा भारतको मनिलामा हुने एसियन च्याम्पियनसिपमा छनोट हुने बताएका छन् ।

नेपाल र्‍याफ्टिङ तथा क्यानोइङ संघ र बाग्मती प्रदेश खेलकुद परिषदको संयुक्त आयोजनामा फागुन ९ गतेबाट शुरु भएको प्रतियोगिताको र्‍याफ्टिङतर्फ १५ टोली र कायाकमा ४६ महिला तथा पुरुष खेलाडीहरुले सहभागिता जनाएको आयोजकले जनाएको छ ।