काठमाडौं (हाम्रो खेलकुद) – नेपाल र्‍याफ्टिङ क्यानोईङ संघकाे वार्षिक कार्यक्रम ११औं राष्ट्रिय कायक स्लालम प्रतियोगिता तथा सातौं राष्ट्रिय र्‍याफ्टिङ प्रतियोगिताकाे तयारी पूरा भएकाे छ ।

प्रतियोगिता ९ देखि ११ फागुनसम्म सिन्धुपाल्चोकको सुकुटेस्थित भोटेकोशी नदीमा हुनेछ । संघका महासचिव सुदिप राज गौतमका अनुसार ३ दिन सम्म संचालन हुने प्रतियोगीतामा विभागीय टिम प्रहरी, सेना तथा सशस्त्र प्रहरीसँगै देशका विभिन्न र्‍याफ्टिङ कम्पनी तथा क्लब गरि १५ टिम सहभागी हुनेछन् ।

वल्र्ड र्‍याफ्टिङ फेडेरेशन एशियाका अध्यक्षको उपस्थितीमा हुने उक्त प्रतियोगीता तीन दिनसम्म संचालन हुनेछ । प्रतियोगिता अन्तर्गत कायक स्लालम व्यक्तीगत खेल हो भने र्‍याफ्टिङ खेल समुहगत खेल हो । र्‍याफ्टिङ खेलमा चार विधाका खेल खेलाईनेछ, जसमा स्प्रिन्ट, स्लालम, हेड टु हेड र डाउन रिभर रेसका चार इभेन्टहरु संचालन गरिनेछ ।

जसमा महिला-पुरुष टिम बिच प्रतिस्पर्धा हुनेछ । सात खेलाडीको टिम रहने र्‍याफ्टिङ खेलमा विजयी लाई पदक प्रमाण पत्र तथा नगद उपहार प्रदान गरिनेछ ।

बाग्मती प्रदेश खेलकुद विकास परिषद को आर्थीक सहयोगमा आयोजना हुने उक्त प्रतियोगीतामा राष्ट्रिय खेलकुद परिषद, नेपाल ओलम्पीक कमीटी, माउन्टेन स्पोर्टस फेडेरेशन, हिमालयन रिभर गाईड एशोसियशन तथा नेपाल एशोसियशन अफ र्‍याफ्टिङ एजेन्सीज को सहयोग रहनेछ ।

संघका अनुसार प्रतियोगिताका लागि नदीमा अब्स्ट्याकल गेटको सर्वेक्षण, सुरक्षा तथा सम्पूर्ण प्राविधिक कार्यका साथै प्रतियोगिताको सम्पूर्ण तयारी पूरा भएको संघले जनाएको छ ।