काठमाडौं (हाम्रो खेलकुद) – प्रदेश खेलकुद विकास परिषद्, बागमती प्रदेश र स्वतन्त्र सामाजिक प्रतिष्ठान पोखराको संयुक्त आयोजनामा तेस्रो संस्करणको मञ्जुश्री अन्तर्राष्ट्रिय अल्ट्रा ट्रेल रेस फागुन तेस्रो साता हुने भएको छ ।

आयोजकले बुधबार राजधानी काठमाडौंमा पत्रकार सम्मेलन गरी अन्तर्राष्ट्रिय अल्ट्रा ट्रेल रेस फागुन २०, २१ र २२ गते हुने जानकारी गराएको छ । ६ विधा समावेश रहेको ट्रेल रेसले उपत्यकाका तीनै जिल्लाको विभिन्न भागलाई समेट्ने आयोजकले जनाएको छ ।

रेसमा १ सय माईलको महिला तथा पुरुष अन्तर्राष्ट्रिय अल्ट्रा ट्रेल रेस, १०० किमिको महिला तथा पुरुष अन्तर्राष्ट्रिय अल्ट्रा ट्रेल रेस, ५४ किमिको महिला तथा पुरुष अन्तर्राष्ट्रिय अल्ट्रा ट्रेल रेस, २४ किमिको अन्तर्राष्ट्रिय ट्रेल रेस, १० किमिको अन्तर्राष्ट्रिय ट्रेल रेस र ५ किमिको अन्तर्राष्ट्रिय ट्रेल रेस विधा समावेश गरिएको छ ।

१ सय माईलको विजेताले १ लाख ५० हजारसहित ट्रफी, उपविजेताले ७५ हजार र तेस्रो हुनेले ३७ हजार ५ सय प्राप्त गर्दा चौथो र पाँचौंले क्रमशः २० हजार र १० हजार पाउनेछन् । १०० किमिको विजेताले ७५ हजार, उपविजेताले ३७ हजार ५ सय र तेस्रोले २० हजार, चौथोले १० हजार तथा पाँचौ हुनेले ५ हजार नगद पुरस्कार प्राप्त गर्नेछन् ।

५४ किमिको विजेताले ५० हजार, उपविजेताले ३० हजार र तेस्रोले २० हजार, चौथोले १० हजार तथा पाँचौंले ५ हजार पाउनेछन् । २४ किमिको विजेताले ३० हजार, उपविजेताले २० हजार र तेस्रोले १५ हजार पाउनेछन् । १० किमिको विजेताले १५ हजार, उपविजेताले १० हजार र तेस्रोले ५ हजार पाउनेछन् ।

५ किमिको विजेताले १० हजार, उपविजेताले ६ हजार र तेस्रोले ३ हजार पाउनेछन् । अनलाईन प्रणालीमार्फत दर्ता गर्नुपर्ने ट्रेल रेसमा ४० देशका करिव ३५० जना धावकहरूको सहभागिता रहने आयोजकले जनाएको छ ।

ट्रेल रेस २४ जना रेस कोर्ष डिजाईनर, ५ जना रेस कोर्ष मार्कर, ३८ जना रेस टाईमिङ व्यक्ति तथा ३८ जना सर्भिस पर्सनको प्रत्यक्ष निगरानी एवं रेफ्री तथा अफिसियलको रोहबरमा हुनेछ ।