काठमाडौं (हाम्रो खेलकुद) – नेपाली बक्सिङको इतिहासमा ऐतिहासिक रजत पदक जितेकी युवा उदियमान बक्सर सुष्मा तामाङलाई शिरिष फाउन्डेसनले सम्मान गरेको छ ।

फाउन्डेसनले आइतबार राजधानीमा पत्रकार सम्मेलन गरी थाइल्यान्डको बैंककमा यसैसाता सम्पन्न एएसबीसी एसियन यू–२२ बक्सिङ च्याम्पियनसिपका ऐतिहासिक रजतधारी सुष्मालाई २५ हजार रुपैयाँले सम्मानित गरेको हो । उनले फाउन्डेसनकी कोषाध्यक्ष सपना गुरुङले २५ हजार रुपैयाँको चेक हस्तान्तरण गरिन् ।

महिला ४५ देखि ४८ केजी तौल समूहमा सुष्मा फाइनलमा उज्वेकिस्तानकी फोजिलोभा फरजोनासँग अंकका आधरमा ५–० ले पराजित हुँदै रजतमा सीमित बनेकी थिइन् ।

एसियालीस्तरमा कुनै पनि उमेर समूहमा नेपाली बक्सिङ खेलाडीले रजतपदक जितेको त्यो पहिलोपटक हो । यसअघि, एसियन गेम्समा नेपाली खेलाडीले कास्यपदक जितेका थिए । फाउन्डेसनबाट सम्मानित भएसँगै सुष्माले यस्तो सम्मानले आउँदा दिनमा अझ राम्रो गर्नका लागि उत्प्रेरणा मिलेको बताइन् ।

‘मैले पहिले तीनवटा अन्तर्राष्ट्रिय प्रतियोगिता खेलिसकेको थिएँ । जसका कारण यस प्रतियोगितामा सहज भयो । पहिलो खेलमा भियतनाम, दोस्रो खेलमा मंगोलियाको खेलाडीलाई पराजित गर्न सफल भए । उज्वेकिस्तानकी खेलाडी एसियन च्याम्पियन हुन् । फाइनलमा पराजित भएपनि मलाई आगामी प्रतियोगिताका लागि प्रेरणा मिलेको छ ।’ सुष्माले भनिन्, ‘मलाई यहाँसम्म पु¥याउन सहयोग गर्नुहुने गुरु, प्रशिक्षकलगायत यो शिरिष फाउन्डेसनलाई पनि धन्यवाद पदन चहान्छु ।’

सुष्माको सम्मान कार्यक्रममा फाउन्डेसनका कार्यालय सचिव जगतमान श्रेष्ठ, फाउन्डेसनका सल्लाहकार प्रचण्ड शर्मा, कपिल किशोर श्रेष्ठ, सुशिल नरसिंह राणा र ओलम्पियन संगिना वैद्यलगायतको उपस्थिति रहेको थियो । फाउन्डेसनले गत भदौंमा सुष्मालाई मासिक १५ हजार रुपैयाँमा १ वर्षको लागि प्रायोजन सम्झौता गरेको थियो ।

बक्सर सुष्मालाई शिरिष फाउन्डेसनको साथ