पोखरा (हाम्रो खेलकुद) – साविक विजेता विभागीय त्रिभुवन आर्मी क्लब तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिताको पुरुषतर्फ चौथो भएको छ ।

यसअघिको दुई संस्करणमा फाइनल खेलेको आर्मी अर्काे विभागीय टोली नेपाल पुलिस क्लबसँग ३–१ को सोझो सेटमा पराजित हुँदै चौथो भएको हो ।

पोखरा रंगशालास्थित भलिबल कोर्टमा शनिबार भएको तेस्रो स्थानमा प्रतिस्पर्धामा आर्मीले सुरुवाती सेट २५–२२ ले जितेपनि त्यसपछिको तीनै सेट १८–२५, २१–२५ र २०–२५ ले गुमाउन पुग्यो । यससँगै पुलिसले लिग चरणमा भोगेको हारको बदला लिएको छ । लिग चरणमा पुलिस ३–० को सोझो सेटमा पराजित भएको थियो ।

राष्ट्रिय खेलाडीको वर्चश्व रहेको आर्मीको यो टाइगर कपमा सबैभन्दा खराव नतिजा हो । आर्मी आफ्नो मुख्य सेटर हरिहजुर थापाविना नै मैदान उत्रिएको थियो । त्यसको प्रभाव टोलीमा देखिएको थियो । तेस्रो भएसँगै पुलिसले १ लाख २५ हजार रुपैयाँ हात पारेको छ । चौथो भएको आर्मीले ६५ हजार रुपैयाँ प्राप्त गर्नेछ ।

आज नै महिलातर्फ उपाधिको लागि दुई विभागीय टोली साविक विजेता नेपाल एपिएफ क्लब र त्रिभुवन आर्मी क्लबबीच प्रतिस्पर्धा हुँदैछ । यस्तै पुरुषतर्फ घरेलु टोली गण्डकी प्रदेशले विभागीय नेपाल एपिएफ क्लबसँग खेल्नेछ ।

महिला र पुरुष दुवैतर्फको विजेताले समान ५ लाख र उपविजेताले २ लाख ५० हजार प्राप्त गर्नेछन् । दुवैतर्फको सर्वोत्कृष्ट खेलाडीले जनही २५ हजार तथा विधागततर्फका उत्कृष्टले समान १० हजार प्राप्त गर्नेछन् ।