माल्दिभ्स (हाम्रो खेलकुद) – नेपाली महिला राष्ट्रिय भलिबल टोलीकी स्टार स्पाइकर प्रतिभा मालीको उच्च प्रदर्शनसँगै क्लब वेम्को माल्दिभ्सको राष्ट्रिय भलिबल प्रतियोगिताको च्याम्पियन बनेको छ ।

प्रतिभा सम्मिलित क्लब वेम्कोले क्लब भलिबललाई ३–१ को सेटमा पराजित गर्दै उपाधि जित्न सफल भएको हो । माल्दिभ्सस्थित सोसल सेन्टर इन्डोर हलमा शुक्रबार राति भएको खेलको पहिलो सेट क्लब वेम्कोले २५–११ ले सहजै आफ्नो पक्षमा पा¥यो ।

दोस्रो सेटमा ५–१० को स्थितिबाट १२–१२ को बराबरी गरेपनि वेम्कोले २२–२५ ले सेट गुमाउन पुग्यो । तेस्रो सेटमा सुरुवाती अग्रतालाई कायम राख्दै वेम्कोले २५–१९ ले जित्न सफल भयो । चौथो सेटमा एकपक्षीय प्रदशन गर्दै २५–१४ को सहज जित निकाल्न सफल भयो ।

क्लब भलिबल लिग राउण्डमा शीर्षस्थानमा रहेर फाइनलमा प्रवेश गर्दा वेम्कोले नेपाली महिला राष्ट्रिय टोलीकी अर्का सदस्य उषा भण्डारीको टोली क्लब एगल्सलाई ३–१ को सेटमा हराएर पाइनलमा प्रवेश गरेको थियो । साविक विजेता पुलिसले राउन्ड रोविन लिगको तीनै खेलमा हार बेहोर्दै बाहिरिएको थियो ।

गत शनिबारबाट सुरु भएको राष्ट्रिय भलिबल प्रतियोगितामा साविक विजेता पुलिस क्लब, क्लब वेम्को, क्लब एगल्स क्लब र क्लब भलिबल गरी चार टोलीले प्रतिस्पर्धा गरेका थिए ।