माले (हाम्रो खेलकुद) – नेपाली महिला राष्ट्रिय भलिबल टोलीकी स्टार स्पाइकर प्रतिभा माली सम्मिलित क्लब वेम्को माल्दिभ्सको राष्ट्रिय भलिबल प्रतियोगिताको फाइनलमा प्रवेश गरेको छ ।

प्रतिभा सम्मिलित क्लब वेम्कोले नेपाली राष्ट्रिय टोलीकै अर्का सदस्य उषा भण्डारी सम्मिलित क्लब एगल्सलाई ३–१ को सेटमा पराजित गर्दै उपाधिनजिक पुगेको हो ।

माल्दिभ्सस्थित युथ सेन्टर इन्डोर हलमा बुधबार राति भएको खेलको पहिलो सेट क्लब वेम्कोले २५–१५ ले आफ्नो पक्षमा पार्यो । दोस्रो सेट १९–२५ ले गुमाएको क्लब वेम्कोले त्यसपछिको दुवै सेट क्रमश २५–२० र २५–१९ ले जित्दै फाइनलमा पुग्न सफल भयो ।

अब क्लब वेम्कोले उपाधिका लागि क्लब भलिबलसँग खेल्नेछ । फाइनल शुक्रबार राति हुनेछ । क्लब भलिबल लिग राउण्डमा शीर्षस्थानमा रहेर फाइनलमा प्रवेश गरिसकेको छ । क्लब भलिबलले ३ खेलबाट ७ अंक जोडेर शीर्षस्थानमा रह्यो

लिगमा क्लब वेम्को ३ खेलबाट ६ अंक जोडेर दोस्रो तथा क्लब एगल्स ४ अंक जोडेर तेस्रो स्थानमा रहेको थियो । यि दुई टोलीले फाइनल प्रवेशका लागि प्रतिस्पर्धा गर्दा क्लब वेम्कोले बाजी मारेको हो । साविक विजेता पुलिसले तीनवटै खेलमा हार बेहोरेर बाहिरिसकेको छ ।

गत शनिबारबाट सुरु भएको राष्ट्रिय भलिबल प्रतियोगितामा साविक विजेता पुलिस क्लब, क्लब वेम्को, क्लब एगल्स क्लब र क्लब भलिबल गरी चार टोलीले प्रतिस्पर्धा गरिरहेको छ ।