पोखरा (हाम्रो खेलकुद) – विभागीय डर्वी भिडन्तमा त्रिभुवन आर्मी क्लबको चुनौती पन्छाउँदै साविक विजेता नेपाल एपिएफ क्लबले तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिताको महिलातर्फ तेस्रो जित निकालेकाे छ।

पोखरा रंगशालास्थित भलिबल कोर्टमा बुधबार भएको राउन्ड रोविन लिगको अन्तिम खेलमा एपिएफले आर्मीलाई ३–१ को सेटमा पराजित गर्दै अपराजित रहेर शीर्षस्थानमा रहन सफल भएको हो ।

पहिलो सेट २५–१७ ले जितेको एपिएफले दोस्रो सेट २२–२५ ले गुमाउन पुगेको थियो । त्यसपछिको दुवै सेटम एपिएफले सहजै २५–१६ र २५–१५ ले जित्न सफल भयो ।

यस जितसँगै एपिएफ ३ खेलबाट ९ अंक जोडेर शीर्षस्थानमा रह्यो । आर्मी तीन खेलबाट ६ अंक जोडेर दोस्रो तथा होङ्गान्जी न्यु डायमण्ड युथ स्पोर्ट्स क्लबले ३ अंब बटुल्दा घरेलु टोली गण्डकी प्रदेश अंकविहीन बन्यो । बुधबारै डायमण्डले गण्डकीलाई १९–२५, २५–१५, २५–१४ र २५–११ को सेटमा हराएर लिगमा तेस्रो स्थान हासिल गरेको छ ।

यस नतिजासँगै महिलातर्फको सेमिफाइनल समिकरण पूरा भएको छ । अब सेमिफाइनलमा शीर्षस्थानमा रहेको एपिएफले पुछारमा रहेको गण्डकीसँग तथा दोस्रो स्थानमा रहेको आर्मी र तेस्रो स्थानमा रहेको न्यु डायमण्डबीच प्रतिस्पर्धा हुनेछ । दुवै सेमिफाइन बिहीबार हुनेछ । तेस्रो स्थानको खेल शुक्रबार तथा फाइनल शनिबार हुनेछ ।

आज नै पुरुषतर्फ आर्मी र गण्डकी तथा एपिएफ र सेन्ट जोसेफबीच खेल हुनेछ ।