तनहुँ (हाम्रो खेलकुद) – मिलेनियम युवा क्लब तनहुँको आयोजनामा खुल्ला साविक वडा स्तरीय पुरुष भलिबल, भेट्रान्स भलिबल प्रतियोगितासँगै विविध कार्यक्रम आयोजना हुने भएको छ ।

क्लबले ३१औं श्रपञ्चमीको अवसर पारेर खुल्ला साविक वडा स्तरीय पुरुष भलिबल, भेट्रान्स भलिबल, महिला म्युजिकल चियर, छेलो, डोरी तान, मकै गन्ने, बाँसको टुप्पोमा रहेको भाले निकाल्ने र घैटो फुटाउने प्रतियोगिता हुने भएको छ । साथै मेलामा राष्ट्रिय तथा स्थानिय कलाकारले प्रस्तुती दिनेछन् ।

श्रीपञ्चमी मेला तनहुँको शुक्ला गण्डकी नगरपालिका १२ स्थित घडेरी खेल मैदानमा मंगलबारदेखि शुक्रबार अर्थात १० देखि १३ माघसम्म हुनेछ । पुरुष भलिबल ११ गतेदेखि तथा भेट्रान्स भलिबल, डोरी तान्ने, छेलो हान्ने र म्युजिकल चियरका खेलकरु माघ १२ देखि हुनेछ ।

पुरुष भलिबलको विजेताले ४० हजार, ट्रफी मेडल र प्रमाण पत्र प्राप्त गर्नेछन् । दोस्रो हुनेले २५ हजार र तेस्रो हुनेले १५ हजार प्राप्त गर्नेछन् । भेट्रान्सको विजेताले खसी र मेडल र दोस्रोले बोका र मेडल जित्नेछन् । यस्तै उत्कृष्ट खेलाडीसँगै व्यक्तिगत विधा (स्पाइकर, सेटर, ब्लकर र सर्भर) ले पनि ट्रफी प्राप्त गर्नेछन् ।

डोरी तान्ने, छेलो हान्ने र म्युजिकल चियरको विजेताले समान ५ हजार र प्रमाण पत्र तथा दोस्रो हुनेले ३ हजार प्राप्त गर्ने क्लबका सदस्य तथा राष्ट्रिय भलिबल रेफ्री टुक बहादुर गुरुङले जानकारी गराए । उनका अनुसार अन्य प्रतियोगिता मकै गन्ने, बाँसको टुप्पोमा रहेको भाले निकाल्ने र घैटो फुटाउने प्रतियोगितामा पनि आकर्षक पुरस्कारको व्यवस्था गरिएको आयोजकले जनाएको छ ।