ललितपुर (हाम्रो खेलकुद) – सुनिल महर्जन र रोनिशा महर्जनले चौथो मेयर कप रात्रीकालिन टेबल टेनिस प्रतियोगिताको उपाधि जितेका छन् ।

सुनिल प्रतियोगिताको मुख्य विधा पुरुष एकल र रोनिसा महिला एकलमा च्याम्पियन बनेकी हुन् । दुवै स्वर्ण विजेता वडा नम्वर १२ का हुन् ।

शनिवार सम्पन्न प्रतियोगिताको अन्तिम दिन पुरुष एकलमा सुनिल महर्जनले वडा ७ का डिकेन महर्जनलाई ४–१ को सेटमा पराजित गर्दै स्वर्ण जित्न सफल भए ।

त्यस्तै महिला एकलमा वडा नम्वर १२ की रोनिशा महर्जनले वडा नम्वर ८ की सुरम्या शाक्यलाई ४–१ ले पराजित गर्दै स्वर्ण पदक जितिन् ।

यो नतिजासँगै ललितपुर वडा नम्वर १२ ले कुल ५ स्वर्ण र ४ काश्य जित्दै टिम च्याम्पियन बन्न सफल भएको छ । त्यस्तै वडा नम्वर १९ ले २ स्वर्ण र १ काश्य जितेर दोस्रो स्थान हात पारे । १ स्वर्ण, २ रजत र ३ काश्य जितेर वडा नम्वर १६ ले तेस्रो भयो ।

शनिवार नै सम्पन्न १६ वर्षमुनिको गल्स फाइनलमा राष्ट्रिय खेलाडी इभाना थापाले स्वर्ण पदक जित्न सफल भइन् । वडा १२ की थापाले प्रतिद्धन्दी वडा नम्वर १६ की अंकिता बज्राचार्यलाई ४–० को सोझो सेटमा पराजित गरिन् ।

ललितपुर जिल्ला टेबल टेनिस संघ, ललितपुर वडा नम्वर १२ र युवा क्लब हःखाद्धारा संयुक्त रुपमा आयोजित प्रतियोगिता अन्तर्गत शनिवार भएको यु–१६ ब्वाइजमा वडा नम्वर १३ का आयुष भारतीले स्वर्ण जिते । उनले वडा ७ का एलेन महर्जनलाई ४–१ को सेटमा हराए ।

त्यस्तै ४० वर्षमाथिको भेट्रान पुरुषको फाइनलमा वडा नम्वर १९ का निकेनमान प्रधानले वडा नम्वर १८ का ठाकुर थापालाई ४–० को सोझो सेटमा पराजित गरे । ५० वर्षमाथिको भेट्रान्समा वडा ११ का राजेन्द्र बज्राचार्यले वडा २० का सुरेश बज्राचार्य ४–० को सोझो सेटमा हराएर स्वर्ण जिते ।

त्यस्तै पुरुष टिम इभेन्ट्समा वडा नम्वर १२ ले वडा नम्वर ७ लाई हराएर टिम च्याम्पियन बनेको छ । ६ दिनसम्म संचालन भएको प्रतियोगितामा ५ सय भन्दा वढी खेलाडिहरुको सहभागिता थियो ।