काठमाडौं (हाम्रो खेलकुद) – साविकको उपविजेता विभागीय नेपाल एपिएफ क्लबको चुनौती पन्छाउँदै नेपाल पुलिस क्लब सातौैं एनभिए महिला तथा पुरुष क्लब भलिबल च्याम्पियनसिपको महिलातर्फ फाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शनिबार भएको रोमाञ्चक र प्रतिस्पर्धात्मक खेलमा ३–२ को सेटमा विजयी हुँदै पुलिस फाइनलमा प्रवेश गरेको हो ।

पहिलो सेट पुलिसले २५–१५ ले आफ्नो पक्षमा पारेको थियो । त्यसपछिको दुवै सेट एपिएफले आफ्नो पक्षमा पार्दै खेलमा २–१ को सेटमा अग्रता लिन सफल भयो ।

दोस्रो सेट एपिएफले २५–१७ ले सहजै आफ्नो पक्षमा पार्दा तेस्रो सेटमा पनि २५–२१ को जित निकाल्न सफल भयो । चौथो सेट पुलिसले २५–२१ ले जित्दै खेललाई २–२ सेटको बराबरीमा ल्याउँदै खेललाई पाँचौ सेटमा लम्ब्याए ।

निर्णायक तथा पाँचौ सेटमा पुलिसले १५–७ को सहज जित हात पार्दै फाइनलमा स्थान पक्का गर्न सफल भयो । पुलिसकी उषा भण्डारी केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् ।

अब पुलिसले उपाधिका लागि आइतबार आर्मी र होङ्गान्जी न्यु डायमण्ड युथ स्पोर्ट्स क्लबको विजेतासँग खेल्नेछ । यि दुई टोलीले आज केहीवेरमा दोस्रो सेमिफाइनल खेल्दैछ ।

पुरुषतर्फ आज नै सेमिफाइनलको प्रतिस्पर्धा हुँदैछ । पहिलो सेमिफाइनलमा आर्मी र एपिएफ तथा दोस्रो सेमिफाइनलमा पुलिस हेल्प नेपालबीच प्रतिस्पर्धा हुँदैछ ।