काठमाडौं (हाम्रो खेलकुद) – फ्रिन्डम फाइटरको दुई टोलीसँगै जोरपाटी एफसी र अभिषेक चर्च प्रथम भनिमण्डल कुसुन्ती भेट्रान्स फुटबल प्रतियोगिताको सेमिफाइनलमा प्रवेश गरेका छन् ।

जावलाखेलस्थित फुटबल मैदानमा शुक्रबार भएको क्वाटरफाइनलमा फ्रिन्डम फाइटरले कोतासे भैरवलाई ६–० को फराकिलो अन्तरले पराजि गर्दै अन्तिम चारमा स्थान पक्का गरेको हो ।

यस्तै आयोजक भनीमण्डललाई २–० ले पराजित गर्दै जोरपाटी एफसीले पनि अन्तिम चारमा स्थान पक्का गरेको छ । फ्रिन्डम फाइटरको अर्काे टोलीले ओकाद भेट्रान्सलाई ३–० ले पराजित गरेको छ ।

अर्काे क्वाटरफाइनलमा अभिषेक चर्च नवलपुरले जेभियर भेट्रान्सलाई २–० ले पराजित गरेको छ । सेमिफाइनल र फाइनल शनिबार हुने आयोजकले जनाएको छ ।

अन्तिम दिन ललितपुर महानगरपालिकाका मेयर चिरीबाबु महर्जन, ललितपुर वडा नम्वर १३ का गणेक केसी, वडा नम्वर ४ का सन्तोष खड्का र अखिल नेपाल फुटबल संघ (एन्फा) का अध्यक्ष पंकज विक्रम नेम्वाङ अतिथि रहने आयोजकले जनाएको छ ।

पुस २६ गते मंगलबारबाट शुरु भएको प्रतियोगितामा ३२ टोलीले नकआउटको आधारमा प्रतिस्पर्धा गरिरहेको छ ।प्रतियोगिताको विजेताले १ लाख ५० हजार रुपैयाँ र शिल्ड प्राप्त गर्नेछन् । दोस्रो हुनेले ७५ हजार पाउनेछ ।

म्यान अफ दि सिरिजले बुद्ध एयरको माउन्टेन फ्लाइट, उत्कृष्ट गोलरक्षकले गोल्डेन ग्लोभ्स र नगद प्राप्त गर्ने आयोजकले जनाएको छ । म्यान अफ दि म्याच शिल्डको व्यवस्था गरिएको छ ।