काठमाडौं (हाम्रो खेलकुद) – गण्डकी प्रदेशको पुरुष भलिबल टोलीलाई पराजित गर्दै साविक विजेता त्रिभुवन आर्मी क्लब सातौैं एनभिए महिला तथा पुरुष क्लब भलिबल च्याम्पियनतिसपको सेमिफाइनलमा प्रवेश गरेको छ ।

आर्मीले गण्डकीलाई ३–१ को सेटमा पराजित गर्दै अन्तिम चारमा स्थान पक्का गरेको हो । त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलको पहिलो सेट आमीले २५–२२ ले आफ्नो पक्षमा पारेको थियो ।

दोस्रो सेट गण्डकीले २५–२१ ले जित्दै खेललाई १–१ सेटको बराबरीमा ल्याए । तेस्रो सेट आर्मीले २५–१० ले सहजै आफ्नो पक्षमा पार्न सफल भयो । चौथो सेटमा गण्डकीले आर्मीलाई बलियो चुनौती पेश गरेपनि आर्मी २६–२४ ले विजयी हुँदै सेमिफाइनलमा पुग्न सफल भयो ।

चौथो सेटमा सुरुवातदेखि नै अग्रता लिएको आर्मीले अन्त्यतिर गण्डकीको बलियो चुनौतीको सामना गर्नुपरेको थियो । आर्मीका सेटर हरि हजुर थापा केल्मी प्लेयर दि म्याच घोषित भए । उनले केल्मी नेपालबाट गिफ्ट ह्याम्पर प्राप्त गरे ।

आज पुरुषतर्फ अब समूह ‘बी’ को विजेता एपिएफ समूह ‘डी’ उपविजेता केशवलाल, समूह ‘सी’ को विजेता पुलिस र समूह ‘ए’ को उपविजेता दावाली मिलन क्लब र समूह ‘डी’ को विजेता हेल्प नेपाल र समूह ‘बी’ को उपविजेता सैलुङ बाघढुंगाबीच शुक्रबार प्रतिस्पर्धा हुनेछ ।