ढोरपाटनमाथि गण्डकीको सहज जित

काठमाडौं (हाम्रो खेलकुद) – ढोरपाटन भलिबल प्रशिक्षण केन्द्रमाथि सहज जित हात पार्दै गण्डकी प्रदेशको पुरुष भलिबल टोलीले काठमाडौंमा जारी सातौं एनभिए महिला तथा पुरुष क्लब भलिबल च्याम्पियनसिपको क्वाटरफाइनलमा प्रवेश गरेको छ ।

गण्डकी समूह ‘सी’ को उपविजेता बन्दै अन्तिम आठमा पुग्न सफल भएको हो । यो समूहबाट नेपाल पुलिस क्लब समूह विजेता बनिसकेको छ । गण्डकीको जितले ढोरपाटन समूह चरणबाटै बाहिरिएको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको खेलमा गण्डकीले ढोपाटनमाथि ३–० को सोझो सेटमा जित निकालेको हो । घरेलु भलिबलमा चर्चित गण्डकीले ढोरपाटनमाथि २५–१२, २५–९ र २५–१० को सोझो सेटमा जित निकाल्न सफल भयो ।

गण्डकीका मिडल ब्लकर हिमाल सुनारी केल्मी प्लेयर अफ दि म्याच घोषित भए । उनले केल्मी नेपालबाट गिफ्ट ह्याम्पर प्राप्त गरे । अब गण्डकीले क्वाटरफाइनलमा साविक विजेता विभागीय त्रिभुवन आर्मी क्लबको सामना गर्नेछ । आर्मी समूह ‘ए’ को विजेता हो ।