हेल्प नेपाल समूह विजेता

काठमाडौं (हाम्रो खेलकुद) – उपाधि दावेदार टिप टप हेल्प नेपाल समूह ‘डी’ को विजेता बन्दै सातौैं एनभिए महिला तथा पुरुष क्लब भलिबल च्याम्पियनसिपको पुरुषतर्फ क्वाटरफाइनलमा प्रवेश गरेको छ ।

हेल्प नेपाल लगातार तेस्रो जित निकाल्दै समूह विजेता बनेको हो । हेल्प नेपालले आफ्नो समूहको अन्तिम खेलमा मधेस प्रदेशलाई ३–० को सोझो सेटमा हरायो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको खेलको पहिलो सेटमा हेल्प नेपाल २५–१८ ले विजयी हुन सफल भयो । दोस्रो सेटमा पछि परेको स्थिति उल्ट्याएर हेल्प नेपालले २५–२२ को जित निकाल्न सफल भयो ।

तेस्रो सेटमा तीन पाकिस्तानी खेलाडीलाई विश्राम दिएको हेल्प नेपालले २५–८ को सहज जित निकाल्न सफल भयो ।हेल्प नेपालका मोहम्मद कासिप नाभिद केल्मी प्लेयर अफ दि म्याच घोषित भए । उनले केल्मी नेपालबाट गिफ्ट ह्याम्पर प्राप्त गरे ।

यस जितसँगै हेल्प नेपालले समूह ‘डी’ मा ३ खेलबाट ९ अंक जोड्याे । पराजित मधेस अंकविहीन हुँदै बाहिरिएको छ । यो समूहबाट केशवलाल स्मृति भलिबल प्रशिक्षण केन्द्र समूह उपविजेता बन्दै क्वाटरफाइनलमा पुगेको छ ।