काठमाडौं (हाम्रो खेलकुद) – उपाधि दावेदार नेपाल एपिएफ क्लबले सातौ एनभिए राष्ट्रिय महिला तथा पुरुष क्लब भलिबल च्याम्पियनसिपमा महिलातर्फ विजयी सुरुवात गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार भएको खेलमा एपिएफले गण्डकी प्रदेशलाई ३–० को सोझो सेटमा पराजित गर्दै विजयी सुरुवात गरेको हो ।

पहिलो सेटमा २५१५ को सहज जित निकालेको एपिएफले त्यसपछिको दुवै सेट क्रमश २५–१० र २५–११ ले सहजै आफ्नो पक्षमा पार्न सफल भयो । एपिएफकी स्पाइकर सरस्वती चौधरी केल्मी प्लेयर अफ दि म्याच घोष्ति भइन् । उनले केल्मी नेपालबाट गिफ्ट ह्याम्पर प्राप्त गरिन् ।

तीन भारतीय खेलाडीको अनुपस्थितिमा गण्डकीको प्रदर्शन एपिएफविरुद्ध निकै फितलो देखिएको थियो । गण्डकी प्रदेशले तीन भारतीय खेलाडीलाई टोलीमा समेटेपनि कोरोना भाइरसका कारण तीन जना नै उपस्थित हुन नसकेको गण्डकी प्रदेश भलिबल संघका अध्यक्ष नविन कुमार गुरुङले जानकारी गराए ।

यस जितसँगै एपिएफले समुह ‘बी’ मा ३ अंक जोडेको छ । यो समूहमा आर्मीको पनि ३ अंक छ । गण्डकी र कृष्ण सेकेन्डरी एकेडेमीले अंकको खाता खोल्न सकेको छैन ।

आज नै महिलातर्फ होङ्गान्जी न्यु डायमण्ड युथ स्पोर्ट्स क्लब र एभरेस्ट भलिबल क्लबबीच प्रतिस्पर्धा हुँदैछ । आज नै पुरुषतर्फ चार खेलमा प्रतिस्पर्धा हुँदैछ ।