काठमाडौं (हाम्रो खेलकुद) – उपाधिको दावेदार विभागीय नेपाल पुलिस क्लबले काठमाडौंमा शुरु भएको साताैं संस्करणको एनभिए राष्ट्रिय महिला तथा पुरुष क्लब भलिबल च्याम्पियनसिपमा पुरुषतर्फ विजयी शुरुवात गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा आइतबार पुलिसले न्युटन भलिबल एकेडेमीलाई सोझो सेटमा पराजित गर्दै विजयी सुरुवात गरेको हो ।

पहिलो सेटमा २५–१६ को सहज जित हात पारेको पुलिसले त्यसपछि दोस्रो सेटमा २५–१७ र तेस्रो सेटमा २५–१६ मा जित निकाल्न सफल भयो । यस जितसँगै पुलिसले समूह ‘सी’ मा ३ अंक जोडेको छ । यो समुहमा पुलिससाँगै गण्डकी, न्युटन, ढोरपाटन र गण्डकी रहेको छ ।

आज नै पुरुषतर्फ साविकको विजेता त्रिभुवन आर्मी क्लबले दावाली मिलन क्लबसँग प्रतिस्पर्धा गर्दैछ । महिलातर्फ पुलिस र आर्मीले विजयी सुरुवात गरेका छन् । माघ १ गतेसम्म हुने च्याम्पियनसिपमा पुरुषतर्फ १५ र महिलामा ८ टोलीको सहभागिता रहेको छ ।

पुरुष र महिला दुवै तर्फको च्याम्पियनले समान ४ लाख रुपैयाँसँगै उपाधि हात पार्नेछन् । दोस्रो हुनेले २ लाख र तेस्रो हुने टोलीले १ लाख रुपैयाँ प्राप्त गर्नेछन् । च्याम्पियनसिपको सर्वाेत्कृष्ट खेलाडीले २५ हजार र हरेक विधा (स्पाइकर, सेटर, ब्लकर, सर्भर, डिफेन्स र प्रशिक्षक) ले जनही १० हजार रुपैयाँ प्राप्त गर्नेछन् ।

त्यस्तै इन्टरनेट सेवा प्रदायक भाएनेटले प्रतियोगिताको विधागत उत्कृष्टलाई ३ महिना र सर्वोत्कृष्ट पुरुष र महिला खेलाडीलाई ६–६ महिनाको इन्टरनेट सेवा प्रदान गर्नेछ ।

यस्तै संघले हाम्रो खेलकुद डटकमसँग १ वर्षको लागि मिडिया राइट्स लिएको जनाएको छ । यससँगै हाम्रो खेलकुद डटकमले संघले १ वर्षभरि गर्ने विभिन्न प्रतियोगिताको प्रत्यक्ष प्रसारण गर्नेछ ।