काठमाडौं (हाम्रो खेलकुद) – नेपाल ओलम्पिक कमिटी (एनओसी) ले कतारमा यसै सातादेखि आयोजना हुने एसियाली टेवल टेनिस च्याम्पियनसिप (फाइनल स्टेज) मा सहभागिता जनाउन जाने दुई नेपाली पुरुष खेलाडीलाई बिदाई गरेका छन् ।

नेपाल ओलम्पिक कमिटिका अध्यक्ष जीवनराम श्रेष्ठले दुई खेलाडी रुविन महर्जन र संयोग कपाली (ओलम्पिक छात्रवृत्ति) लाई बुधबार नेपाल ओलम्पिक कमिटिको मुख्यालय सातदोबाटोमा बिदाई गरेका हुन् ।

एसियाली फाइनल स्टेज कतारमा जनवरी ७ देखि १३ सम्म हुँदैछ । अध्यक्ष श्रेष्ठले सहभागिहरुलाई शुभकामना दिँदै आत्मविश्वास नै सफलताको मूल आधार भएको बताए । नेपालबाट पुरुषमा ५ र महिलामा एक गरी ६ खेलाडी छनोट भएपनि दुई जनाले मात्रै सहभागिता जनाउने भएका हुन् ।

गत मंसिरमा काठमाडौंमा भएको दक्षिण एसियाली क्षेत्रीया च्याम्पियनसिपको छनोटमा शीर्ष १६ मा पर्दै नेपालबाट ६ खेलाडी छनोट भएका थिए । पुरुषतर्फ संयोग कपाली, रुविन महर्जन, बिनेश खनिया, शिव सुन्दर गोथे र प्रदीप रोक्का र महिलामा नेपालको शीर्ष वरियताकी नविता श्रेष्ठ छनोट हुन सफल भएकी थिइन् ।

बिदाई कार्यक्रममा एनओसी सदस्य रमेश शिवाकोटी, अखिल नेपाल टेबल टेनिस संघका अध्यक्ष चतुरानन्द राजवैद्य, कोषाध्यक्ष तेजेन्द्र सिंह महरा, सञ्जीव ढुंगेल, दक्षिण एसियाली टेबलटेनिस महासंघका महासचिव शंकर गौतम, एनओसी मेडिकल कमिसनका अध्यक्ष डा.सरोजकृष्ण श्रेष्ठ, डा नविसमान सिंह प्रधान र डा.ज्ञानेन्द्र शाहको उपस्थिति रहेको थियो ।