काठमाडौं (हाम्रो खेलकुद) – सैलुङ बाघढुंगा स्पोर्ट्स क्लब रामेछापले प्रथम ढोरपाटन फोर ए साइड (पार्क) भलिबल च्याम्पियनसिपको उपाधि जितेको छ ।

नयाँ बसपार्कस्थित ढोरपाटन स्पोर्ट्स क्लबको कोर्टमा मंगलबार भएको फाइनलमा मामा भान्जा स्पोर्ट्स क्लबलाई ३–१ को सेटमा पराजित गर्दै उपाधि जित्न सफल भएको हो ।

पहिलो सेट २५–२३ ले जितेको सैलुङले दोस्रो सेट १८–२५ ले गुमाउन पुग्यो । त्यसपछिको दुवै सेट समान २५–१९ र २५–१९ ले आफ्नो पक्षमा पार्दै सैलुङ च्याम्पियन बन्न सफल भयो ।

त्यसअघि ब्रदर्श स्पोर्ट्स क्लबलाई ३–२ को सेटमा पराजित गर्दै कन्चन स्पोर्ट्स क्लबले तेस्रो स्थान हासिल गरेको छ । मंगलबार नै सेमिफाइनलको खेल भएको थियो ।

उपाधिसँगै सैलुङले १ लाख रुपैयाँकप र गोल्ड मेडल प्राप्त गरेको छ । दोस्रो भएको मामा–भान्जाले ५० हजार, कप र सिल्भर मेडल हात पारेको छ । तेस्रो भएको कन्चन स्पोर्ट्स क्लबले २५ हजार रुपैया, कप र ब्रन्ज मेडल तथा चौथो भएको ब्रदर्सले १५ हजार रुपैया हात पार्नेछ ।

सैलुङका समिप श्रेष्ठ सर्वाेत्कृष्ट खेलाडी घोषित भए । उनले ६ हजार रुपैयाँसहित कप हात पारे । मामा भान्जाका सन्जु विक्रम शाह उत्कृष्ट स्पाइकर र मामा भान्जाकै विष्णु बस्नेत उत्कृष्ट सर्भर चुनिए । सैलुङका मनोज घिमिरे उत्कृष्ट सेटर र सैलुङकै भरत खत्री ब्लकर चुनिए । उनीहरुले समान ३ हजार रुपैयाँ हात पारेको छ ।

विजयी टोलीलाई नेपाल भलिबल संघका सदस्य जुनु पुन, दीपक लामा र ढोरपाटन क्लबका अध्यक्ष मनवीर छन्त्याल र किरण घायललगायतले पुरस्कृत गरे । १४ पुसबाट भएको प्रतियोगितामा २३ टोलीको सहभागिता रहेको थियो । सहभागी टोलीले लिग कम नकआउटका आधारमा प्रतिस्पर्धा गरेका थिए ।