काठमाडौं (हाम्रो खेलकुद) – जे गरौ, गज्जवले गरौ भन्ने नाराका साथ नुवाकोटको वेलकोटगढी नगरपालिका वडा नम्बर ५ को आयोजना तथा एथलेटिक्स परिवारको प्राविधिक सहयोगमा सञ्चालन हुने सातौ झिल्टुङ क्रस कन्ट्री दौड माघ १४ गते शनिबार हुने भएको छ ।

आयाेजक वेलकोटगढी नगरपालिका वडा नम्बर ५ ले प्रेस विज्ञप्ति जारी गर्दै झिल्टुङ क्रस कन्ट्री दौड माघकाे १४ गते हुने जनाएकाे छ । प्रतियोगिताको १३.५ किमि पुरुष तथा महिला विजेतालाई १५ हजार, दोस्रोलाई १० हजार र तेस्रो हुनेलाई समान ५ हजार रुपैयाँ प्रदान गरिनेछ ।

स्थानीय बेलकोटगढी नगरपालिका भित्रका पुरुष विजेतालाई १० हजार, दोस्रोलाई ७ हजार र तेस्रो हुनेलाई समान ५ हजार रुपैयाँ प्रदान गरिनेछ । ४.५ किमिको खुल्ला जुनियर छात्र तथा छात्रालाई समान ६ हजार, दोस्रो हुनेलाई ४ हजार र तेस्रो हुनेलाई २ हजार रुपैयाँ प्रदान गरिनेछ ।

स्थानीय छात्र, छात्रातर्फ विजेतालाई ६ हजार, दोस्रोलाई ४ हजार र तेस्रो २ हजार रुपैयाँ पुरस्कारको ब्यवस्था गरिएको छ । ४.५ किमिको ४५ वर्ष माथिका स्थानीय पुरुष विजेतालाई ६ हजार, दोस्रोलाई ४ हजार र तेस्रो २ हजार  तथा १३.५ किमि.खुल्ला भेट्रान खुल्ला पुरुषतर्फ  विजेतालाई ८ हजार, दोस्रोलाई ६ हजार र तेस्रोलाई ४ हजार प्रदान गरिने छ ।

त्यस्तै ४. ५ किमीको आमा समुह दौडका विजेताले १२ हजार, ९ हजार र  ६ हजार रुपैयाँको पुरस्कार प्राप्त गर्नेछन् । उक्त दौड प्रतियोगितामा करीव ५०० खेलाडीहरुले भाग लिने अनुमान गरीएको र प्रतियोगिताको अनुमानित खर्च १० लाख रुपैयाँ रहेको छ ।

उक्त दौड प्रतियोगिता कोल्पुटारबाट सुरु भएर बेलिनी, छाप, राजओडार, खड्गाछाप, सालचौर हुँदै पुन कोल्पुटारमा आएर समापन हुनेछ ।

प्रतियोगिताको व्यवस्थापकमा बेल्कोटगढी नगरपालिका वडा नं. ५ का वडा अध्यक्ष मदन भुजेल र संयोजकमा एथलेटिक्स परिवार, नेपालका सल्लाहकार मोहन नेपाल रहेका छन् ।