काठमाडौं (हाम्रो खेलकुद) – मामा–भान्जा, ब्रदर्श, कन्च र सैलुङ बाघढुंगा राजधानीमा जारी प्रथम ढोरपाटन फोर ए साइड (पार्क) भलिबल च्याम्पियनसिपकाे सेमिफाइनलमा प्रवेश गरेका छन् ।

नयाँ बसपार्कस्थित ढोरपाटन स्पोर्ट्स क्लबको कोर्टमा सोमबार भएको पहिलो क्वाटरफाइनलमा किङ्स क्लब काठमाडौंलाई २९–२७ र २५–१६ ले पराजित गरी सैलुङ बाघढुंगा स्पोर्ट्स क्लब रामेछाप अन्तिम चारमा पुग्न सफल भएको हो ।

दोस्रो क्वाटरफाइनलमा कन्चन स्पोर्ट्स क्लबले आयोजक ढोरपाटन ‘ए’ लाई २५–२२ र २५–१६ ले पराजित गर्दै सेमिफाइनलमा पुग्न सफल भयो । यस्तै तेस्रो क्वाटरफाइनलमा ब्रदर्श स्पोर्ट्स क्लबले नेपाल गणतान्त्रिक खेलकुद महासंघलाई २५–१९ र २५–२२ ले पराजित गर्दै अन्तिम चारमा पुग्न सफल भयो ।

अन्तिम क्वाटरफाइनलमा मामा–भान्जा टिमले बुढानिलकण्ठ भलिबल क्लबलाई २५–१७, २१–२५ र २५–१६ ले पराजित गर्दै सेमिफाइनलमा पुग्न सफल भयो । त्यसअघि मामा–भान्जाले रुवी भ्यालीलाई २५–१३ र २५–२१ ले पराजित गरी क्वाटरफाइनलमा स्थन बनाएको थियो ।

सोमबारै ब्रदर्श स्पोर्ट्स क्लब र मामा–भान्जा टिमबीच सेमिफाइनलमा प्रतिस्पर्धा भएपनि लाइट प्रोटेस्टका कारण खेल स्थगित भएको छ । दुवै टोलीले समान दुई सेट जित हात पारेपछि खेल लाइट प्रोटेस्टका कारण हुन नसकेको आयोजक ढोरपाटन क्लबका अध्यक्ष मनवीर छन्त्यालले जानकारी गराए ।

अब मंगलबार दुई सेमिफाइनलसँगै फाइनल र तेस्रो स्थानको लागि प्रतिस्पर्धा हुने आयोजकले जनाएको छ । सेमिफाइनलमा ब्रदर्श र मामा भान्जा तथा सैलुङ र कन्चनबीच प्रतिस्पर्धा हुनेछ ।

प्रतियोगिताको विजेताले १ लाख रुपैयाँ, कप र गोल्ड मेडल प्राप्त गर्नेछ । दोस्रो हुनेले ५० हजार, कप र सिल्भर मेडल प्राप्त गर्नेछ । तेस्रो हुनेले २५ हजार रुपैया, कप र ब्रन्ज मेडल प्राप्त गर्नेछ । चौथो हुनेले १५ हजार रुपैया हात पार्नेछ ।

च्याम्पियनसिपको सर्वाेत्कृष्ट खेलाडीले ६ हजार रुपैया तथा व्यक्तिगत विधातर्फ पनि जनही ३ हजार रुपैया प्रदान गरिने आयोजकले जनाएको छ ।