काठमाडौं (हाम्रो खेलकुद) – आयोजक ढोरपाटन स्पोर्ट्स क्लब ‘ए’, किङ्स क्लब र बुढानिलकण्ठ भलिबल क्लब समुह विजेता बन्दै प्रथम ढोरपाटन फोर ए साइड (पार्क) भलिबल च्याम्पियनसिपका प्रि–क्वाटरफाइनलमा प्रवेश गरेका छन् ।

नयाँ बसपार्कस्थित ढोरपाटन स्पोर्ट्स क्लबको कोर्टमा शनिबार जेनेक्स भलिबल क्लबलाई २५–१८ र २५–१३ को सोझो सेटमा पराजित गर्दै ढोरपाटन ‘ए’ समूह ‘ए’ को विजेता बनेको हो । हारको बावजुत जेनेक्स समूह उपविजेता बनेको छ ।

यस्तै किङ्स क्लबले रुवी भ्याली २०–२५, २५–१६ र २५–२० ले पराजित गर्दै समूह ‘एफ’ को विजेता बनेको छ । हारका बावजुत रुवी भ्याली उपविजेता बनेको छ ।

सैलुङ स्पोर्ट्स क्लबलाई २५–२१ र २५–१६ ले पराजित गर्दै बुढानिलकण्ठ भलिबल क्लब समूह ‘जी’ को विजेता बनेको छ । बुढानिलकण्ठसँग पराजित हुनुअघि आर आर क्याम्पसलाई २५–२० र २५–१७ हराएको सैलुङ स्पोर्ट्स क्लब पनि समूह उपविजेता बनेको छ ।

यस्तै घोराखारी युवा क्लबलाई २३–२५, २५–२० र २५–२० ले पराजित गरी न्युटन ‘डी’ समूह ‘ई’ को विजेता बनेको छ । खोटाङ टिमलाई २५–१५ र २५–२१ ले हराएको घोराखारी पनि समूह उपविजेताको रुपमा अघि बढेको छ ।

यस्तै ढोरपाटन ‘सी’ पनि समूह ‘बी’ को विजेता बनेको छ । समूह विजेता बन्ने क्रममा ढोरपाटनले मैदान स्पोर्ट्स क्लबमाथि २५–१७ र २६–२४ को जित निकाल्यो । मैदान पनि उपविजेताको रुपमा अघि बढेको छ ।

एन्जल्स हार्ट कलेजलाई २५–१३ र २५–२१ पराजित गर्दै कञ्चन स्पोर्ट्स समूह ‘डी’ को उपविजेता बन्दै अन्तिम १६ मा पुगेको छ । यो समूहबाट ब्रदर्श स्पोर्ट्स क्लब समूह विजेता बनिसकेको छ ।

ढोरपाटन स्पोर्ट्स क्लबको आयोजनामा १८ पुससम्म चल्ने प्रतियोगितामाप्रतियोगितामा विभिन्न २३ टोलीको सहभागिता रहेको छ । सहभागी टोलीलाई ८ समूहमा विभाजन गरिएको छ । हरेक समूहका शीर्ष दुई टोलीले प्रि–क्वाटरफाइनलमा स्थान बनाउनेछन् ।

प्रतियोगिताको विजेताले १ लाख रुपैयाँ, कप र गोल्ड मेडल प्राप्त गर्नेछ । दोस्रो हुनेले ५० हजार, कप र सिल्भर मेडल प्राप्त गर्नेछ । तेस्रो हुनेले २५ हजार रुपैया, कप र ब्रन्ज मेडल प्राप्त गर्नेछ । चौथो हुनेले १५ हजार रुपैया हात पार्नेछ ।

च्याम्पियनसिपको सर्वाेत्कृष्ट खेलाडीले ६ हजार रुपैया तथा व्यक्तिगत विधातर्फ पनि जनही ३ हजार रुपैया प्रदान गरिने आयोजकले जनाएको छ ।