काठमाडौं (हाम्रो खेलकुद) – ब्ल्याक हर्स सुजका प्रोपाइटर चिन बहादुर श्रेष्ठले आफ्नो जन्मदिनको अवसर पारी कभर्ड हल निर्माणलाई आर्थिक सहयोग प्रदान गरेका छन् ।

ब्ल्याक हर्स सुजका प्रोपाइटर श्रेष्ठले आफ्नो जन्मदिनको अवसर पारी शुक्रबार न्यु डायमन्ड युथ स्पोर्ट्स क्लब काठमाडौं निर्माणधीन वर्षा ओत्ने भलिबल कभर्ड हल सहयोग अभियानमा १ लाख १ हजार १ सय १ रुपैया सहयोग प्रदान गरेका हुन् ।

श्रेष्ठले क्लबका अध्यक्ष कुमार राईलाई आफ्नै कार्यालयमा उक्त सहयोग रकम प्रदान गरेका हुन् । सहयोग रकम प्रदान गर्दै प्रोपाइटर श्रेष्ठले न्यु डायमण्डको कभर्डहल निर्माणमा केही सहयोग पुगोस् भन्ने उद्देश्यले सहयोग प्रदान गरिएको बताए । ब्ल्याक हर्स सुजले यसअघि पनि विभिन्न खेलकुद प्रतियोगितामा पनि प्रायोजन गर्दै आइरहेको छ ।

क्लबको कभर्डहल निर्माणलाई सहयोग अभियान आउने क्रम जारी छ । यसअघि समाजसेवी तथा हङकङमा रहेका रमेश राईले १ लाख १ हजार १ सय ११ रुपैया सहयोग गरिसकेका छन् । यस्तै पहिलो चरणमा हाल पोर्चुगलमा रहेका समाजसेवी तथा भलिबल प्रेमी फुनुरु शेर्पाले ५५ हजार ५ सय ५५ रुपैयाँ सहयोग गरेका छन् ।

न्यु डायमण्डले चन्द्रागिरि नगरपालिका १३ स्थित नैकापमा विगत १ महिनादेखि २ रोपनीभन्दा बढी जग्गामा आवासीय सुविधासहितको कभर्डहल निर्माण गरिरहेको छ । क्लबले सोही निर्माणधीन कभर्डहलमा माघको अन्तिम सातादेखि फागुनको पहिलो सातासम्म स्कुल स्तरीय यु१८ खुल्ला महिला भलिबल च्याम्पियन आयोजना गर्ने तयारी गरिरहेको छ ।