काठमाडौं (हाम्रो खेलकुद) – नेपालको मानबहादुर श्रेष्ठ र दिल सुनारको जोडी एसियन सेन्ट्रल जोन सिनियर पुरुष र महिला बिच भलिबल च्याम्पियनसिपमा पुरुषतर्फ दोस्राे भएको छ ।

बंगलादेशको कक्सबजारस्थित डल्फिन बिचमा शुक्रबार बिहान भएको फाइनलमा माल्दिभ्सका एडाम नासिम र स्मेलको जोडीसँग २–० को सोझो सेटमा पराजित भएपछि च्याम्पियन बन्नबाट चुकेको हो ।

पहिलो सेट १३–२१ ले गुमाएको नेपालले दोस्रो सेटमा पनि शुरुवातमा बलियो चुनौती पेश गरेपनि त्यही लयलाई कायम राख्न नसक्दा १९–२१ ले गुमाउन पुग्यो ।

मान बहादुर श्रेष्ठ र दिल सुनारको नेपालको जोडीले बिहीबार किर्गिस्तानको मोडेबेक उलुलु र जिनबेक उलुलुको जोडीलाई २६–२४ र २१–१३ ले पराजित गर्दै फाइनलमा स्थान बनाएको थियो ।

किर्गिस्तानलाई २–० को सोझो सेटमा हराएर बंगलादेशले तेस्रो स्थान हासिल गरेको छ । पुरुषतर्फ बंगलादेशसँगै नेपाल, किर्गिस्तान, भुटान र माल्दिभ्सको सहभागिता रहेको छ ।

महिलातर्फ पनि बिहीबार कोपिला उप्रेती र कमला पुनको जोडी पनि श्रीलंकाकी चथुरिका र दीपिकाको जोडीसँग २–० को सोझो सेटमा पराजित हुँदै दोस्रो भएको थियो ।

महिलातर्फ बंगलादेश र उज्वेकिस्तानको समान दुई टोली तथा नेपाल र श्रीलंकाको समान एक टोली गरी कुल ६ टोलीको सहभागिता रहेको थियो ।