काठमाडौं (हाम्रो खेलकुद) – नेपालको कोपिला उप्रेती र कमला पुनको जोडी बंगलादेशको कक्स बजारमा जारी एसियन सेन्ट्रल जोन सिनियर पुरुष र महिला बिच भलिबल च्याम्पियनसिप अन्तरगत महिलातर्फ दोस्रो भएको छ ।

बंगलादेशको कक्सबजारस्थित डल्फिन बिचमा बिहीबार श्रीलंकाकी चथुरिका र दीपिकाको जोडीसँग २–० को सोझो सेटमा पराजित हुँदै दोस्रो भएको हो ।

समूह चरण र सेमिफाइनलमा राम्रो प्रदर्शन गरेको नेपाली टोली फाइनलमा भने बलियो मानिएको श्रीलंकाको चथुरिका र दीपिकाको जोडीसँग निरिह बन्न पुग्यो । नेपाली टोलीले पहिलो र दोस्रो सेट समान ११–२१ र ११–२१ ले गुमाउन पुग्दा च्याम्पियन बन्नबाट वञ्चित रह्यो ।

यसअघि कोपिला र कमलाको जोडीले सेमिफाइनलमा उज्वेकिस्तानकी सतिभोलदिभा र जमोलोभाको जोडीलाई २१–१२ र २१–१४ ले हराउँदा लिग चरणमा उज्वेकिस्तानकी सुल्तानबोइभा र कुचकोरोभाको जोडीमाथि २१–१६ र २१–१५ र बंगलादेशकी अख्तर र खातुनमाथि २१–१८ र २१–१८ को सोझो सेटमा हराएर पोल विजेता बनेको थियो ।

महिलातर्फ बंगलादेश र उज्वेकिस्तानको समान दुई टोली तथा नेपाल र श्रीलंकाको समान एक टोली गरी कुल ६ टोलीको सहभागिता रहेको थियो ।

यस्तै पुरुषतर्फ मान बहादुर श्रेष्ठ र दिल सुनारको नेपाली जोडी फाइनलमा प्रवेश गरेको छ । मानबहादुर र दिलको जोडीले किर्गिस्तानको मोडेबेक उलुलु र जिनबेक उलुलुको जोडीमाथि २–० को सोझो सेटमा जित निकाल्दै फाइनलमा पुग्न सफल भयो ।

पहिलो सेटमा २६–२४ को प्रतिस्पर्धात्मक जित निकालेको नेपालले त्यसपछि दोस्रो सेटमा भने २१–१३ को सहज जित निकाल्यो । अब मान र दिलको जोडीले उपाधिका लागि शुक्रबार माल्दिभ्सको एडाम र स्मेलको जोडीसँग प्रतिस्पर्धा गर्नेछ ।

पुरुषतर्फ बंगलादेशसँगै नेपाल, किर्गिस्तान, भुटान र माल्दिभ्सको सहभागिता रहेको छ ।