काठमाडौं (हाम्रो खेलकुद) – नेपालको पुरुष र महिला बिच भलिबल टोली बंगलादेशको कक्स बजारमा जारी एसियन सेन्ट्रल जोन सिनियर पुरुष र महिला बिच भलिबल च्याम्पियनसिपको सेमिफाइनलमा प्रवेश गरेका छन् ।

पुरुष टोली लिग चरणको एक खेल बाँकी छँदै तथा महिला टोली पोल ‘ए’ मा दुई खेलमा नै जित निकाल्दै विजेता बनेर अन्तिम चारमा पुग्न सफल भएको हो ।

बंगलादेशको कक्सबजारस्थित डल्फिन बिचमा बुधबार भएको पुरुषतर्फको पहिलो खेलमा मानबहादुर श्रेष्ठ र दिल सुनारको नेपाली जोडीले बंगलादेशका विश्वास पाभेलको जोडीमाथि २१–१८ र २१–१९ को सेटमा जित निकाल्यो ।

अर्काे खेलमा मानबहादुर र दिलको जोडीको माल्दिभ्सको अहमेद र सामेलको जोडीलाई २–१ को सेटमा पराजित गर्दै एक खेल बाँकी छँदै सेमिफाइनलमा पुग्न सफल भएको हो ।

पहिलो सेट १७–२१ ले गुमाएको नेपालले त्यसपछिको दुवै सेट २१–१४ र १५–९ को सेटमा जित निकाल्यो । मान र दिलको जोडीले अब लिग चरणमा बंगलादेशका नुर नावी र सेफ उद्धिनसँग खेल्नेछ । यो खेलमा जित निकाले मान र दिलको जोडी पोल विजेता बन्नेछ ।

महिलातर्फ कोपिला उप्रेती र कमला पुनको नेपाली जोडीले उज्वेकिस्तानकी सुल्तानबोइभा र कुचकोरोभाको जोडीमाथि २१–१६ र २१–१५ को सोझो सेटमा पराजित गर्दा दोस्रो खेलमा अख्तर र खातुनमाथि २१–१८ र २१–१८ को सोझो सेटमा हराएर समूह विजेता बन्न सफल भयो ।

बिच भलिबलमा पुरुषतर्फ बंगलादेशसँगै नेपाल, किर्गिस्तान, भुटान र माल्दिभ्सको सहभागिता रहेको छ । महिलातर्फ बंगलादेश र उज्वेकिस्तानको समान दुई टोली तथा नेपाल र श्रीलंकाको समान एक टोली गरी कुल ६ टोली रहेका छन् ।