काठमाडौं (हाम्रो खेलकुद) – आयोजक सेन्ट जेभियर स्कुलको चुनौती सहजै पन्छाउँदै माया युनिभर्स एकेडेमी तनहुँ २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको च्याम्पियन बनेको छ ।

२०१९ को च्याम्पियन माया युनिभर्सले सेन्ट जेभियरलाई ४–० ले पराजित गर्दै उपाधि जित्न सफल भएको हो । सेन्ट जेभियर स्कुल गोदावारीको खेल मैदानमा सोमबार भएको फाइनलमा माया युनिभर्सको जितमा मन्जिल श्रेष्ठ र इबास विकले समान दुई गोल गरे । मन्जिल फाइनल खेलको प्लेयर अफ दि म्याच घोषित भए ।

सोमबारै नेपाल डन बस्को स्कुललाई टाईब्रेकरमा ४–३ ले हराउँदै मोर्डन इन्डियन स्कुल चोभारले तेस्रो स्थान हासिल गरेको छ । निर्धारित समयमा १–१ गोलको बराबरीपछि खेल पेनाल्टीमा पुग्दा मोर्डनले बाजी मारेको हो । निर्धारित समयमा मोर्डनका विलास पन्तले गोल गर्दा डन बस्कोका रुप्सन नेपालले गोल फर्काए ।

च्याम्पियन बनेको माया युनिभर्सले च्याम्पियन ट्रफी हात पारेको छ । दोस्रो भएको सेन्ट जेभियरले उपविजेता ट्रफी तथा तेस्रो भएको सेन्ट जेभियरले तेस्रो ट्रफी हात पार्दा चौथो भएको नेपाल डन बस्कोले फेयर प्ले ट्रफी हात पारेको छ ।

सेन्ट जेभियर्सका सन्देश टुडु प्रतियोगिताको सर्वाेत्कृष्ट खेलाडी बनेका छन् । माया युनिभर्सका आदित्य विक उत्कृष्ट गोलकिपर चुनिए । मोर्डनका प्रतिक बानियाँ उत्कृष्ट डिफेन्सिभ खेलाडी घोषित भए ।

मोर्डनकै जोन राउत उदियामान खेलाडी घोषित भए । प्रतियोगिताभर १३ गोल गरेका माया युनिभर्सका इबास विक सर्वाधिक गोलकर्ता भए । माया युनिभर्सकै जोरिस भान डार्प उत्कृष्ट प्रशिक्षक चुनिए ।

विजयी टोली तथा उत्कृष्ट खेलाडीहरुलाई गोदावारी नगरपालिकाका मेयर गजेन्द्र महर्जन, सेन्ट जेभियर स्कुल सुपेरिअर फादर जर्ज पीएम, सेन्ट जेभियरका प्रिन्सिपल फादर विजय प्रताप टोप्पोले ट्रफी, मेडल, प्रमाणपत्र र गिफ्टह्याम्पर प्रदान गरे ।

सेन्ट जेभियर स्कुल गोदावारीको आयोजनामा मंसिर २६ गते सोमबारबाट सुरु भएको प्रतियोगितामा विभिन्न १६ विद्यालयले प्रतिस्पर्धा गरेका थिए ।