काठमाडौं (हाम्रो खेलकुद) – बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपमा नेपाल चौथो भएको छ ।

सोमबार तेस्रो स्थानको लागि भएको खेलमा श्रीलंकासँग ३–२ को सेटमा पराजित हुँदै चार टोली सहभागी च्याम्पियनसिपमा नेपाल चौथो भएको हो । नेपालले श्रीलंकालाई बलियाे चुनाैती पेश गरेपनि जित निकाल्न सकेन ।

नेपालले च्याम्पियनसिपमा ५ खेल खेल्दा जितविहीन बन्यो । नोपलले च्याम्पियनसिपमा १५ सेट गुमाउँदा ४ सेटमा जित निकाल्यो । नेपालले राउन्ड रोविन लिगमा बलियो किर्गिस्तानसँग २ सेट जित्दै अंक बटुलेको थियो । त्यसपछि तेस्रो स्थानमा लागि भएको खेलमा श्रीलंकाविरुद्ध २ सेट जित्न सफल भयो ।

बंगलादेश ढाका मिरपुरस्थित शाहिद शुरवार्दी नेशनल इन्डोर रंगशालामा नेपालले पहिलाे र चाैथाे सेटमा जित निकाल्दा दाेस्राे, तेस्राे र पाँचाै सेट गुमाउन पुग्यो ।

पहिलो सेटमा एक समय २०–११ को आरामदायी अग्रता बनाएको नेपालले २४–१७ ले अघि रह्यो । तर, त्यसपछि श्रीलंकाले लगातार ६ अंक जोडेर २४–२२ को स्थितिमा ल्याएपनि नेपालले एक अंक बटुल्दै पहिलो सेट २५–२२ ले आफ्नो पक्षमा पार्न सफल भयो ।

दोस्रो सेटमा १३–१३ को बराबरीको अवस्थाबाट पछि परेको नेपालले १९–२५ ले सेट गुमाउन पुग्यो । तेस्रो सेटमा सुरुवातदेखि नै पछि परेको नेपालले पूनरागमनको प्रयास गरेपनि १९–२५ ले नै सेट गुमाउन पुग्यो ।

प्रतिस्पर्धात्मक बनेको चौथो सेटमा ११–११ को बराबरीबाट अघि बढेको नेपालले १९–१३ को अग्रता जोगाउँदै २५–२० ले सेट आफ्नो पक्षमा पार्दै खेललाई पाँचौ सेटमा लम्ब्याए । प्रतिस्पर्धात्मक र रोमाञ्चक बनेको चौथो सेटमा १०–१० को बराबरीबाट पछि परेको नेपालले लगातार ५ अंक गुमाउँदा सेट पनि १०–१५ ले गुमाउँदै पराजित हुन पुग्यो ।

आज नै उपाधिको लागि घरेलु टोली बंगलादेश र किर्गिस्तानबीच प्रतिस्पर्धा हुनेछ । च्याम्पियनसिपमा बंगलादेश अपराजित एक्लो टोली हो । किर्गिस्तानले बंगलादेशसँग नै ३–२ को सेटमा पराजित भएको थियो ।