पोखरा (हाम्रो खेलकुद) – जिल्ला भलिबल संघ स्याङ्जा प्रथम गण्डकी प्रदेश स्तरीय पुरुष भलिबल प्रतियोगिताको च्याम्पियन बनेको छ ।

बागलुङ भलिबल संघलाई ३–२ को सेटमा पराजित गर्दै स्याङ्जाले उपाधि जित्न सफल भएको हो । पोखरा रंगशालास्थित भलिबल कोर्टमा आइतबार भएको रोमाञ्चक र प्रतिस्पर्धात्मक फाइनलको पहिलो सेट स्याङ्जाले २१–२५ ले गुमाएको थियो ।

त्यसपछि दोस्रो र तेस्रो सेट क्रमश २५–२३ र २५–२३ ले आफ्नो पक्षमा पार्दै स्याङ्जा खेलमा फर्किएको थियो । निकै नै रोमाञ्चक र प्रतिस्पर्धात्मक बनेको चौथो सेटमा सुरुवातमा पछि रहेको स्याङ्जाले १८–१८ को बराबरीबाट अग्रता लिदै २२–१९ को अग्रता लिएपनि त्यसलाई जोगाउन नसक्दा २८–३० ले सेट गुमाउन पुग्यो ।

निर्णायक तथा पाँचौ सेट प्रतिस्पर्धात्मक बनेपनि स्याङ्जा १५–१३ को सेटमा विजयी हुँदै च्याम्पियन बन्न सफल भयो । यस्तै जिल्ला भलिबल संघ नवलपुरले कास्की जिल्ला भलिबल संघलाई २५–२२, २५–१६ र २६–२४ ले हराएर तेस्रो स्थान हासिल गरेको छ ।

च्याम्पियन बनेको स्याङ्जाले २ लाख रुपैया हात पारेको छ । दोस्रो भएको बागलुङले १ लाख रुपैया हात पारेको छ । तेस्रो भएको नवलपुरले ५० हजार र सात्वना भएको कास्कीले २५ हजार प्राप्त गरेका छन् ।

स्याङ्जाका कप्तान हरि पाण्डे प्रतियोगिताको सर्वाेत्कृष्ट खेलाडी बनेका छन् । सर्वाेत्कृष्ट बनेको हरिले २० हजार रुपैया प्राप्त गरेको छ ।

नवलपुरका घनश्याम चौधरी उत्कृष्ट सर्भर, स्याङ्जाका देवु राना उत्कृष्ट ब्लकर, स्याङ्जाकै राजन दर्लामी मगर उत्कृष्ट लिवेरो, बागलुङका प्रकाश सुनार स्पाइकर, बागलुङकै मीन सुनार उत्कृष्ट सेटर र स्याङ्जाका राजेन्द्र शर्मा उत्कृष्ट प्रशिक्षक चुनिएका छन् । उनीहरुले समान १० हजार रुपैया हात पारेका छन् ।

६ पुसबाट शुरु भएको गण्डकी प्रदेश स्तरीय भलिबल प्रतियोगितामा मनाङ र मुस्ताङ बाहेक गण्डकीका बागलुङ, कास्की, नवलपुर, स्याङ्जा, म्याग्दी, तनहुँ, लमजुङ, कास्की र गोरखा गरी ९ टोलीको सहभागिता रहेको थियो ।

सहभागी टोलीलाई दुई समूहमा विभाजन गरिएको थियो । यस प्रतियोगितालाई गण्डकी प्रदेश भलिबल संघले काठमाडौंमा हुने एनभिए क्लब च्याम्पियनसिप र पोखरामै हुने टाइगर कपको लागि खेलाडी छनोटको रुपमा रहने बताएको थियो ।