काठमाडौं (हाम्रो खेलकुद) – श्रीलंकामाथि सोझो सेटमा जित निकाल्दै उपाधिको बलियो दावेदार किर्गिस्तान बंगलादेशमा जारी बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपको फाइनलमा प्रवेश गरेको छ ।

बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा किर्गिस्तानले श्रीलंकामाथि ३–० को सोझो सेटमा जित निकाल्दै उपाधि नजिक पुगेको हो ।

प्रतिस्पर्धात्मक र रोमाञ्चक बनेको पहिलो सेट किर्गिस्तानले २९–२७ ले आफ्नो पक्षमा पारेको थियो । दोस्रो सेटमा २५–२१ को सहज जित निकालेको किर्गिस्तानले तेस्रो सेटमा २५–२० काे सहज जित निकाल्न सफल भयो ।

यस सँगै किर्गिस्तानले श्रीलंकालाई दोस्रो पटक पराजित गर्न सफल भएको छ । यसअघि राउन्ड रोविन लिगमा किर्गिस्तानले ३–१ को सेटमा जित निकालेको थियो ।

अब किर्गिस्तानको उपाधिको लागि सोमबार बंगलादेश र नेपाल बीचको विजेतासँग खेल्नेछ । श्रीलंकाले तेस्रो स्थानको लागि बंगलादेश र नेपालबीच पराजित हुने टोलीसँग खेल्नेछ ।

आज नै च्याम्पियनसिपमा अपराजित रहेको घरेलु टोली बंगलादेश र नेपालबीच दोस्रो सेमिफाइनलमा प्रतिस्पर्धा हुँदैछ । यस खेलमा जित निकाल्ने टोलीले उपाधिका लागि किर्गिस्तानसँग तथा पराजित हुनेले तेस्रो स्थानको लागि श्रीलंकासँग खेल्नेछ ।