काठमाडौं (हाम्रो खेलकुद) – नेपाल प्रोफेसनल गल्फर एसोसिएसन (एनपिजिए) को आयोजनामा हुने सूर्य नेपाल गल्फ टुर, २०२२–२०२३ को सिजनको दोस्रो प्रतियोगिता सुर्य नेपाल इस्टर्न ओपन मंगलबारदेखि धरानमा सुरु हुँदैछ ।

विभिन्न आठ प्रतियोगिता समावेश टुरअन्तर्गत दोस्रो प्रतियोगिता सूर्य नेपाल इस्टर्न ओपन मंगलबारदेखि धरान गल्फ क्लबमा हुने एनपिजिएका महासचिव दीपक आचार्यले शनिबार आयोजित पत्रकार सम्मेलनमा जानकारी गराए ।

चार दिनसम्म चल्ने प्रतियोगितामा कम्तीमा ३२ व्यवसायिक र १५ एमेच्योर खेलाडीको सहभागिता रहने आयोजकले जनाएको छ । यसमा धरान (स्थानिय) नै ७ प्रो गल्फर छन् ।

प्रतियोगिताको कुल पुरस्कार राशी ७ लाख ७५ हजार रुपैयाँ छ । ३० डिसेम्वरसम्म ५४ होलसम्म चल्ने प्रतियोगिताको विजेताले १ लाख ४० हजार रुपैया प्राीत गर्नेछन् । उपविजेताले ९० हजार तथा तेस्रो हुनेले ६७ हजार रुपैया हात पार्नेछन् । यस्तै चौथो देखि शीर्ष २१ पनि नगद पुरस्कार प्राप्त गर्नेछन् ।

प्रोतर्फ स्थानिय शुक्र बहादुर राईसँगै भुवन नगरकोटी, जयराम श्रेष्ठ, मणि राज राई, सन्जय लामा र धन थापालाई मुख्य दावेदारको रुपमा हेरिएको छ । अन्तिम दिन १८ होलमा खेल हुनेछ ।

एनपिजिएका अध्यक्ष रविन्द्र मान श्रेष्ठले सिजनको पहिलो प्रतियोगिता सुर्य नेपाल काठमाडौं ओपन प्रतियोगिता राम्रो रहेको धरानमा स्थानिय प्रो गल्फरहरुले राम्रो गर्नेमा आशावादी रहेको बताए ।