काठमाडौं (हाम्रो खेलकुद) – बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपको सेमिफाइनलमा नेपालले अपराजित रहेको घरेलु बंगलादेशसँग खेल्दैछ ।

यो खेल बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा नेपाली समयअनुसार साँझ ५: १५ बजेपछि हुनेछ ।

नेपाल अपराजित रहेको बंगलादेशलाई स्तब्ध पार्दै फाइनलमा पुग्ने लक्ष्यमा कोर्टमा उत्रनेछ । तर, यसका लागि नेपालले सानदार प्रदर्शन गर्नुपर्नेछ । नेपाल समूह चरणमा ३–० को सोझो सेटमा पराजित भएको थियो । बंगलादेश जारी च्याम्पियनसिपमा अपराजित रहने एक्लो टोली हो ।

यता, बंगलादेश पनि अपराजित रहँदै फाइनल पुग्ने दाउँमा हुनेछ । राउन्ड रोविनमा बंगलादेशले पहिलो खेलमा नेपाललाई ३–० को सोझो सेटमा पराजित गर्दा किर्गिस्तानलाई ३–१ को सेटमा तथा श्रीलंकामाथि ३–२ को सेटमा जित निकालेको थियो । आज नै पहिलाे सेमिफाइनलमा श्रीलंका र किर्गिस्तानबीच दिउँसो २:४५ बजे प्रतिस्पर्धा हुनेछ ।

बंगलादेशले ३ खेलबाट ७ अंक जोड्यो । किर्गिस्तानले ३ खेलबाट ५ अंक जोड्दा श्रीलंकाले ३ खेलबाटै ४ अंक जोडेर राउन्ड रोविन लिगमा तेस्रो भयो । नेपालले ३ खेलबाट १ अंक जोडेर पुछारमा रह्यो ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ । फाइनल तथा तेस्रो स्थानको खेल सोमबार हुनेछ ।