काठमाडौं (हाम्राे खेलकुद) – आयोजक सेन्ट जेभियर र माया युनिभर्स तनहुँ ललितपुरमा जारी २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको फाइनलमा प्रवेश गरेका छन् ।

सेन्ट जेभियर र माया युनिभर्सले आ–आफ्नो खेलमा सफलता हात पार्दै उपाधि नजिक पुगेका हुन् । सेन्ट जेभियर स्कुल गोदावारीको खेल मैदानमा शनिबार भएको पहिलो सेमिफाइनलमा आयोजक सेन्ट जेभियरले मोर्डन इन्डियन स्कुल चोभारमाथि २–० को जित निकाल्दै फाइनलमा पुग्न सफल भयो । सेन्ट जेभियरको जितमा दुवै गोल सन्देश टुडुले गरे । उनी नै प्लेयर अफ दि म्याच घोषित भए ।

अर्काे सेमिफाइनलमा माया युनिभर्स एकेडेमी तनहुँले नेपाल डन बस्को स्कुल लुभु ललितपुरलाई ४–१ ले पराजित गर्दै फाइनलमा पुग्न सफल भयो । माया युनिभर्सको जितमा विवेक परियाले दुई तथा सुप्रिम मगरले एक गोल गर्दा एक गोल उपहार पायो । डन बस्कोका सुरेश तामाङले एक गोल फर्काए । मायाका युनिभर्सका विवेक परियार प्लेयर अफ दि म्याच घोषित भए ।

फाइनल तथा तेस्रो स्थानको खेल सोमबार हुने आयोजकले जनाएको छ । फाइनलमा सेन्ट जेभियर र माया युनिभर्स तथा तेस्रो स्थानको लागि मोर्डन इन्डियन र नेपाल डन बस्कोबीच खेल हुनेछ ।

सेन्ट जेभियर स्कुल गोदावारीको आयोजनामा मंसिर २६ गते सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।