काठमाडौं (हाम्रो खेलकुद) – नेपालले बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपको सेमिफाइनलमा अपराजित रहेको घरेलु टाेली बंगलादेशसँग खेल्नुपर्ने भएको छ ।

राउन्ड रोविन लिगको अन्तिम खेलमा श्रीलंकालाई ३–२ को रोमाञ्चक र प्रतिस्पर्धात्मक सेटमा पराजित गर्दै बंगलादेश अपराजित रहँदै शीर्षस्थानमा रह्यो । राउन्ड रोविन लिगमा घरेलु टाेली बंगलादेश अपराजित रहने एक्लाे टाेली हाे । बंगलादेशले तीनै खेलमा जित निकाल्दा श्रीलंका र किर्गिस्तानले दुई खेलमा तथा नेपालले तीनै खेलमा हार बेहाेर्याे ।

खेल तालिका अनुसार राउन्ड रोविन लिगको शीर्षस्थान र चौथो स्थानमा रहने टोली तथा दोस्रो र तेस्रो हुने टोलीबीच सेमिफाइनल हुने तालिका छ । बंगलादेशले ३ खेलबाट ८ अंक जोड्यो । जितविहीन नेपालले ३ खेलबाट १ अंक जोड्यो । किर्गिस्तानले ३ खेलबाट ५ अंक जोड्दा श्रीलंकाले ३ खेलबाटै ४ अंक जोडेर राउन्ड रोविन लिगमा तेस्रो भयो ।

अब सेमिफाइनल बंगलादेश र नेपाल तथा किर्गिस्तान र श्रीलंकाबीच प्रतिस्पर्धा हुनेछ । दुवै सेमिफाइनल आइतबार तथा फाइनल र तेस्रो स्थानको खेल सोमबार हनेछ ।

बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा शनिबार भएको खेलको पहिलो सेट बंगलादेशले २५–१६ ले सहजै आफ्नो पक्षमा पारेको थियो । त्यसपछिको दुवै सेट २२–२५ र २३–२५ ले गुमाएको बंगलादेशले चौथो सेट २५–१३ ले आफ्नो पक्षमा पार्दै खेलमा फर्किएको थियो ।

पाँचौ तथा निर्णायक सेट निकै रोमाञ्चक र प्रतिस्पर्धात्मक बनेको थियो । बंगलादेश ८–९ ले पछि रहँदा श्रीलंकाको रोटेसन बिग्रिएको भन्दै खेल झन्डै २४ मिनेट रोकिएको थियो ।

त्यसपछि ८–९ कै स्थितिबाट खेल शुरु हुँदा बंगलादेशले ११–११ को बराबरीबाट लगातार ३ अंक जोड्दै जिततर्फ अग्रसर बनेपनि श्रीलंकाले लगातार २ अंक जोड्दै खेलमा फर्कने संकेत दिएपनि बंगलादेशले १ अंक जोड्दै १५–१३ ले सेट आफ्ना् पक्षमा पार्दै राउन्ड रोविन लिगमा अपराजित रहन सफल भयो ।

शनिबारै नेपालले किर्गिस्तानविरुद्धको खेल ३–२ को सेटमा गुमाउँदै लगातार तेस्रो हारको नतिजा निकाल्यो । बंगलादेश र श्रीलंकासँग सोझो सेटमा पराजित भएको नेपालले किर्गिस्तानलाई कडा चुनौती दिदै २ सेट जितेर च्याम्पियनसिपमा पहिलो अंक बटुल्न सफल भयो । नेपालले किर्गिस्तानसँग १६–२५, २५–२३, १७–२५, २५–१९ र ६–१५ ले गुमायो ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ । सेमिफाइनल १० पुसमा तथा फाइनल ११ पुसमा हुुनेछ ।