काठमाडौं (हाम्रो खेलकुद) – बंगलादेशमा जारी बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपको राउन्ड रोविन लिगको अन्तिम खेलमा नेपालले आज (शनिबार) किर्गिस्तानसँग खेल्दैछ ।

यो खेल बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा नेपाली समयअनुसार दिउँसो २ः४५ बजेपछि हुनेछ ।

बलियो किर्गिस्तानलाई स्तब्ध पार्दै नेपाल च्याम्पियनसिपमा पहिलो जित निकाल्ने लक्ष्यमा हुनेछ । नेपालले यसअघि बंगलादेश र श्रीलंकासँग ३–० को सोझो सेटमा हार बेहोरिसकेको छ ।

यता किर्गिस्तान नेपाललाई हराएर च्याम्पियनसिपमा दोस्रो जितको लक्ष्यमा हुनेछ । किर्गिस्तानले श्रीलंकालाई ३–१ को सेटमा पराजित गर्दा घरेलु टोली बंगलादेशसँग ३–१ को सेटमा पराजित भएको थियो ।

आज नै घरेलु टोली बंगलादेश र श्रीलंकाबीच प्रतिस्पर्धा हुनेछ । बंगलादेश लगातार तेस्रो जित निकाल्दै राउन्ड रोविन लिगमा शीर्षस्थानमा रहने दाउँमा हुनेछ । श्रीलंका पनि दोस्रो जित निकाल्ने लक्ष्यमा कोर्टमा उत्रनेछ ।

राउन्ड रोविन लिगको दोस्रो चरणको खेल सकिदा बंगलादेश ६ अंक जोडेर शीर्षस्थानमा रहेको छ । श्रीलंका र किर्गिस्तानको समान ३ अंक रहेपनि श्रीलंका दोस्रो र किर्गिस्तान तेस्रो स्थानमा छ । अंकको खाता खोल्न नसकेको नेपाल पुछारमा छ ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ । सहभागी टोलीले राउन्ड रोविन लिगको आधारमा प्रतिस्पर्धा गरिरहेको छ ।

राउन्ड रोविन लिगमा पहिलो र चौथो टोली तथा दोस्रो र तेस्रो हुने टोलीले फाइनल प्रवेशका लागि प्रतिस्पर्धा गर्नेछ । सेमिफाइनल १० पुसमा तथा फाइनल ११ पुसमा हुुनेछ ।