काठमाडाैं (हाम्राे खेलकुद) – बंगलादेशमा जारी बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपमा नेपालले लगातार दोस्रो हार बेहोरेको छ ।

नेपाल श्रीलंकासँग पनि ३–० को सोझो सेटमा पराजित हुँदै लगातार दोस्रो हार बेहोर्न पुगेको हो । यसअघि नेपालले बिहीबार घरेलु टोली बंगलादेशसँग ३–० कै सोझो सेटमा हार बेहोरेको थियो ।

बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा भएको प्रतिस्पर्धात्मक र रोमाञ्चक बनेको पहिलो सेट नेपालले २४–२६ ले गुमाउन पुगेको थियो ।

एक समय ४–१० ले पछि रहेको नेपालले त्यसपछि पुनरागमन गर्दै १७–१७ को बराबरीबाट अग्रता लिएपनि त्यसलाई जोगाउन सकेन । २४–२४ को बराबरीको अवस्थामा रहँदा कप्तान धिरोज कुमार बस्नेत र हेमन्त मल्लले गल्ती गर्न पुग्दा नेपालले सेट गुमाउन पुग्यो ।

दोस्रो सेटमा भने नेपालले श्रीलंकालाई बलियो चुनौती पेश गर्न नसक्दा सेट १८–२५ ले गुमाउन पुग्यो । तेस्रो सेटमा सुरुवातदेखि नै पछि परेको नेपालले श्रीलंकालाई पछ्याएपनि १7–२५ ले गुमाउन पुग्यो ।

पहिलो जितसँर्ग श्रीलंकाले दुई खेलबाट ३ अंक जोडेको छ । लगातार दोस्रो हार बेहोरेको नेपालले अंकको खाता खेल्न सकेको छैन ।

आज नै बंगलादेश र किर्गिस्तानबीच प्रतिस्पर्धा हुनेछ । दुवै टोली दोस्रो जितको खोजीमा हुनेछ । बंगलादेशले नेपाललाई ३–० को सोझो सेटमा तथा किर्गिस्तानले श्रीलंकालाई ३–१ को सेटमा हराएको थियो ।

अब नेपालले शनिबार किर्गिस्तानसँग राउन्ड राेविन लिगकाे अन्तिम खेल खेल्नेछ । च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ । सहभागी टोलीले राउन्ड रोविन लिगको आधारमा प्रतिस्पर्धा गर्नेछ ।

राउन्ड रोविन लिगमा पहिलो र चौथो टोली तथा दोस्रो र तेस्रो हुने टोलीले फाइनल प्रवेशका लागि प्रतिस्पर्धा गर्नेछ । सेमिफाइनल १० पुसमा तथा फाइनल ११ पुसमा हुुनेछ ।