काठमाडौं (हाम्रो खेलकुद) – बंगलादेशमा बिहीबारदेखि शुरु भएको बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपमा आज (शुक्रबार) नेपालले आफ्नो दोस्रो खेलमा श्रीलंकासँग खेल्दैछ ।

नेपाल र श्रीलंकाबीचको खेलमा बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा नेपाली समयअनुसार दिउँसो २ः४५ बजेपछि शुरु हुनेछ ।

दुवै टोली पहिलो जितको खोजीमा हुनेछ । नेपाल पहिलो खेलमा घरेलु टोली बंगलादेशसँग ३–० को सोझो सेटमा पराजित हुँदा श्रीलंका किर्गिस्तानसँग ३–१ को सेटमा पराजित भएको थियो ।

उमेर समूहमा बलियो मानिएको बंगलादेशविरुद्ध उच्च प्रदर्शन गरेपनि नेपालले नतिजा आफ्नो पक्षमा पार्न सकेको थिएन । कप्तान तथा ओपन स्पाइकर धिरोज कुमार बस्नेत, अर्का ओपरन रवि केसी, मिडल ब्लकर सफल विक र सेटर सम्राट बस्नेतले बंगलादेशविरुद्ध सानदार प्रदर्शन गरेका थिए ।

उनीहरु नै टोलीको प्रमुख हतियार हुनेछ । बंगलादेशसँगकाे गल्तीलाई सुधार्दै नेपाल श्रीलंकालाई हराएर पहिलाे जितकाे खाेजीमा काेर्टमा उत्रनेछ ।

यता, उपाधिको बलियो दावेदार मानिएको किर्गिस्तानसँग एक सेट खोस्न सफल भएको श्रीलंका पनि नेपाललाई हराउँदै पहिलो जितको खोजीमा हुनेछ ।

आज नै घरेलु टोली बंगलादेश र किर्गिस्तानबीचको खेल अपरान्ह ५ः१५ बजेपछि हुनेछ । दुवै टोली लगातार दोस्रो जित निकाल्ने लक्ष्यमा हुनेछ ।

पहिलो राउन्डको खेल सकिदा बंगलादेश र किर्गिस्तानले समान ३ अंक जोडेको छ । नेपाल र श्रीलंका अंकविहीन छ । त्यसपछि ९ पुसमा किर्गिस्तानसँग खेल्नेछ । च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ ।

सहभागी टोलीले राउन्ड रोविन लिगको आधारमा प्रतिस्पर्धा गर्नेछ । राउन्ड रोविन लिगमा पहिलो र चौथो टोली तथा दोस्रो र तेस्रो हुने टोलीले फाइनल प्रवेशका लागि प्रतिस्पर्धा गर्नेछ । सेमिफाइनल १० पुसमा तथा फाइनल ११ पुसमा हुुनेछ ।