एजेन्सी – उपाधिको बलियो दावेदार किर्गिस्तानले बंगलादेशमा बिहीबारदेखि शुरु भएको बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपमा विजयी सुरुवात गरेको छ ।

किर्गिस्तानले श्रीलंकामाथि ३–१ को सेटमा जित निकाल्दै विजयी सुरुवात गरेको हो । बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा बिहीबार भएको खेलको पहिलो सेट किर्गिस्तानले २५–२१ ले जितेको थियो ।

दोस्रो सेटमा २५–२२ को जित निकालेको किर्गिस्तानले तेस्रो सेट भने २२–२५ ले गुमाउन पुगेको थियो । सुरुवाती तीन सेटमै किर्गिस्तानलाई बलियो चुनौती दिएको श्रीलंका चौथो सेटमा भने निरिह बन्न पुग्यो ।

९–९ को बराबरीको स्थितिबाट पछि परेको श्रीलंकाले त्यसपछि लगातार ६ अंक गुमाउँदा ९–१५ ले पछि पर्यो । त्यसपछि श्रीलंकाले थप ९ अंक जोड्दा किर्गिस्तानलाई १८–२५ ले नतिजा सुम्पियो । यस जितसँगै राउन्ड रोविन लिगमा किर्गिस्तानले ३ अंक जोडेको छ । श्रीलंका अंकविहीन छ ।

बिहीबार नै भएको राउन्ड रोविन लिगको पहिलो खेलमा घरेलु टोली बंगलादेशसँग नेपालले ३–० को सोझो सेटमा हार बेहोरेको छ । तीनै सेटमा बलियो चुनौती पेश गरेको नेपालले बंगलादेशसँग २४–२६, २२–२५ र २१–२५ को सेटमा हार बेहोर्न पुग्यो । पहिलो राउन्डको खेल सकिदा बंगलादेशले पनि ३ अंक जोडेको छ । नेपाल अंकविहीन छ ।

राउन्ड रोविन लिगको दोस्रो खेलमा नेपालले अब ८ पुसमा श्रीलंकासँग खेल्नेछ । त्यसपछि ९ पुसमा किर्गिस्तानसँग खेल्नेछ । च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ ।

सहभागी टोलीले राउन्ड रोविन लिगको आधारमा प्रतिस्पर्धा गर्नेछ । राउन्ड रोविन लिगमा पहिलो र चौथो टोली तथा दोस्रो र तेस्रो हुने टोलीले फाइनल प्रवेशका लागि प्रतिस्पर्धा गर्नेछ । सेमिफाइनल १० पुसमा तथा फाइनल ११ पुसमा हुुनेछ ।