काठमाडौं (हाम्राे खेलकुद) – आयोजक सेन्ट जेभियर र माया युनिभर्स तनहुँ ललितपुरमा जारी २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको सेमिफाइनलमा प्रवेश गरेका छन् ।

सेन्ट जेभियर स्कुल गोदावारीको खेल मैदानमा बिहीबार भएको पहिलो क्वाटरफाइनलमा माया युनिभर्स एकेडेमी तनहुँले भक्तपुर निस्टमाथि ६–१ को फराकिलो सजत हात पार्दै अन्तिम चारको यात्रा तय गर्न सफल भयो ।

माया युनिभर्सको फराकिलो जितमा इबस बिकले ह्याट्रिकसहित ४ गोल गरे । स्यारोन कटुवाल र अमिर दुराले समान एक गोल गरे । भक्तपुर निस्टले सुप्रिम मगरबाट आत्मघाती गोल उपहार पाए । इबस नै प्लेयर अफ दि म्याच चुनिए ।

बिहीबारको दोस्रो सेमिफाइनलमा आयोजक सेन्ट जेभियर्स गोदावारीले लिटिल एन्जल्स स्कुल हात्तीवन ललितपुरलाई टाइब्रेकरमा ३–० ले पराजित गर्दै सेमिफाइनलमा पुग्न सफल भयो ।

निर्धारित समयमा २–२ गोलको बराबरीपछि खेल टाइब्रेकरमा लम्बिएको थियो । सेन्ट जेभियरका सन्देश टुडुले दुवै गोल गर्दा लिटिल एन्जल्सका स्मित रावतले दुवै गोल फर्काए । सेन्ट जेभियरका थाङसाङ सावा प्लेयर अफ दि म्याच चुनिए ।

यससँगै २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको सेमिफाइनल समिकरण पूरा भएको छ ।

अब शनिबार हुने सेमिफाइनलमा मोर्डन इन्डियन स्कुल र आयोजक सेन्ट जेभियर तथा अर्काे सेमिफाइनलमा नेपाल डन बस्को र माया युनिभर्सबीच प्रतिस्पर्धा हुनेछ ।

सेन्ट जेभियर स्कुल गोदावारीको आयोजनामा मंसिर २६ गते सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।