काठमाडौं (हाम्रो खेलकुद) – बंगलादेशमा आज (बिहीबार) देखि शुरु भएको बंगबन्धु एसियन सेन्ट्रल जोन यू२३ पुरुष अन्तर्राष्ट्रिय भलिबल च्याम्पियनसिपमा नेपालले पहिलो खेलमा घरेलु टाेली बंगलादेशसँग हार बेहोरेको छ ।

बंगलादेशको ढाका मिरपुरस्थित शाहिद शुरवार्दी नेशनल इन्डोर रंगशालामा नेपाल घरेलु तथा आयोजक बंगलादेशसँग ३–० को सोझो सेटमा पराजित भएको हो । कप्तान धिरोज कुमार बस्नेत, रवि केसी, सफल विक र सेटर सम्राट भण्डारीले उत्कृष्ट खेल पस्कदा नेपालले बलियो मानिएको बंगलादेशलाई बलियो चुनौती पेश गरेको थियो ।

पहिलो सेटमा एक समय २–८ ले पछि रहेको नेपालले उत्कृष्ट पूनरागमन गर्दै १०–१० को बराबरी गर्दै १२–१० ले अग्रता लिन सफल भएको थियो । तर, त्यो अग्रतालाई जोगाउन नसक्दा नेपालले पहिलो सेट २४–२६ ले गुमाउन पुग्यो । २४–२४ को बराबरीको स्थितिमा नेपालले अंक बटुल्न सकेन ।

दोस्रो सेटमा एक समय ७–२ को आरामदायी अग्रतामा रहेको नेपालले त्यसलाई जोगाउन सकेन । बंगलादेशले १०–७ को स्थितिबाट लगातार ३ अंक जोड्दै खेललाई १०–१० को बराबरीमा ल्याउदै खेलमा पकड बनाउँदा नेपाल खेलमा फर्कन सकेन । त्यसपछि नेपाल १८–२१ ले पछि पर्यो । त्यसपछि नेपालले खेललााई २२–२४ को स्थितिमा ल्याएपनि बंगलादेशले अंक बटुलेपछि नेपालले दोस्रो सेट २२–२५ ले गुमाउन पुग्यो ।

तेस्रो सेटमा पनि नेपालले बंगलादेशलाई बलियाे चुनाैती पेश गरेपनि पराजित हुन पुग्यो । नेपालले तेस्रो सेट २५–२१ ले गुमाउन पुग्यो । आज नै किर्गिस्तान र श्रीलंकाबीच प्रतिस्पर्धा हुनेछ । राउन्ड रोविन लिगको दोस्रो खेलमा नेपालले अब ८ पुसमा श्रीलंकासँग खेल्नेछ । त्यसपछि ९ पुसमा किर्गिस्तानसँग खेल्नेछ ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेका कारण चारै टोली सेमिफाइनलमा पुगिसकेको छ । सहभागी टोलीले राउन्ड रोविन लिगको आधारमा प्रतिस्पर्धा गर्नेछ ।

राउन्ड रोविन लिगमा पहिलो र चौथो टोली तथा दोस्रो र तेस्रो हुने टोलीले फाइनल प्रवेशका लागि प्रतिस्पर्धा गर्नेछ । सेमिफाइनल १० पुसमा तथा फाइनल ११ पुसमा हुुनेछ ।