काठमाडौं (हाम्रो खेलकुद) – मोर्डन इन्डियन स्कुल चोभार काठमाडौं र नेपाल डन बस्को स्कुल लुभु ललितपुरमा जारी २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको सेमिफाइनलमा प्रवेश गरेका छन् ।

सेन्ट जेभियर स्कुल गोदावारीको खेल मैदानमा बुधबार भएको क्वाटरफाइनलमा सफलता हात पार्दै मोर्डन र डन बस्कोले अन्तिम चारको यात्रा तय गरेका हुन् ।

पहिलो क्वाटरफाइनलमा मोर्डन इन्डियनले सेन्ट जेभियर स्कुल जावलाखेललाई टाइब्रेकरमा ४–२ ले पराजित गर्दै अन्तिम चारमा स्थान पक्का गर्न सफल भए । निर्धारित समयमा कुनै गोल निस्कन नसकेपछि खेलको निर्णय टाइब्रेकरमा लिइदा मोर्डनले बाजी मार्यो । मोर्डनका मिङ्मा पाख्रिन प्लेयर अफ दि म्याच घोषित भए ।

बुधबारै भएको अर्काे क्वाटरफाइनलमा नेपाल डन बस्कोले सेन्ट जेभियर डिओनिया झापालाई ३–० ले पराजित गर्दै सेमिफाइनलमा पुग्न सफल भयो । नेपाल डन बस्कोको जितमा रुप्सन नेपालले दुई तथा सुरेश तामाङले एक गोल गरे । रुप्सन प्लेयर अफ दि म्याच घोषित भए ।

बिहीबार माया युनिभर्स र भक्तपुर निस्ट तथा लिटिल एन्जल्स र आयोजक सेन्ट जेभियर गोदावारीबीच क्वाटरफाइनलमा प्रतिस्पर्धा हुनेछ । सेन्ट जेभियर स्कुल गोदावारीको आयोजनामा गत सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।