काठमाडौं (हाम्रो खेलकुद) – बंगलादेशमा बिहीबारदेखि शुरु हुने काभा यू२३ पुरुष भलिबल च्याम्पियनसिपमा सहभागिता जनाउन नेपाली यू२३ भलिबल टोली त्यसतर्फ प्रस्थान गरेका छन् ।

१९ सदस्यीय नेपाली टोली मंगलबार बंगलादेशकाे ढाका प्रस्थान गरेको हो । काभा यू२३ भलिबल च्याम्पियनसिप ७ देखि ११ पुससम्म बंगलादेशको ढाकामा आयोजना हुँदैछ ।

नेपाल भलिबल संघले यू२३ पुरुष भलिबल टोली एसियन सेन्ट्रल जोन सिनियर पुरुष र महिला बिच भलिबल च्याम्पियनसिप खेल्न जाने नेपाली टोलीलाई आइतबारै बिदाई गरिसकेको छ ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेको छ । चार टोलीको मात्रै सहभागिता रहेकाले सबै टोली सेमिफाइनलमा पुगिसकेको छ । सहभागी टोलीले राउन्ड रोविन लिगको आधारमा प्रतिस्पर्धा गर्नेछ ।

नेपालले च्याम्पियनसिपको पहिलो खेलमा आयोजक बंगलादेशसँग ७ पुसमा खेल्दैछ । सोही दिन किर्गिस्तान र श्रीलंकाबीच प्रतिस्पर्धा हुनेछ । राउन्ड रोविन लिगको दोस्रो खेलमा नेपालले ८ पुसमा श्रीलंकासँग तथा ९ पुसमा किर्गिस्तानसँग खेल्नेछ ।

१० पुसमा हुने पहिलाे सेमिफाइनलमा राउन्ड रोविन लिगको शीर्ष टाेली र पुछारकाे टाेली तथा दाेस्राे सेमिफाइनलमा राउन्ड रोविन लिगको दाेस्राे र तेस्राे हुने टाेलीबीच प्रतिस्पर्धा हुनेछ । फाइनल ११ पुसमा हुुनेछ । साेही दिन तेस्राे र चाैथाेकाे लागि प्रतिस्पर्धा हुनेछ ।

च्याम्पियनसिपका लागि छनोटमा सहभागी ८० खेलाडीबाट बन्द प्रशिक्षणमा २० खेलाडी छनोट गर्दै त्यसबाट अन्तिम १४ सदस्यीय टोली घोषणा गरिसकेको छ । मुख्य प्रशिक्षकमा जगदिश प्रसाद भट्ट र प्रशिक्षक भरत यादव रहेका छन् ।

नेपाली यू२३ भलिबल टोली
धिरोज कुमार बस्नेत (कप्तान), रवि केसी, सन्तोष खत्री, अर्जुन नेपाली, रुप बहादुर गुरौ, बिष्णु बस्नेत, सफल विक, सन्तोष महता, मनिष मानन्धर, हेमन्त मल्ल, वेद प्रकाश जोशी, सम्राट भण्डारी, गौरव पाण्डे र भीम राज गुरुङ जगदिश प्रसाद भट्ट (मुख्य प्रशिक्षक), भरत यादव (सहायक प्रशिक्षक), जितेन्द्र श्रेष्ठ (व्यवस्थापक) ।