काठमाडौं (हाम्रो खेलकुद) – सेन्ट जेभियर स्कुल डिओनिया झापा, भक्तपुर निस्ट र नेपाल डन बस्को स्कुल लुभु ललितपुरमा जारी २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको क्वाटरफाइनलमा प्रवेश गरेका छन् ।

सेन्ट जेभियर स्कुल गोदावारीको खेल मैदानमा सोमबार भएको लिग चरणको अन्तिम खेलमा सफलता हात पार्दै सेन्ट जेभियर डिओनिया, भक्तपुर निस्ट र नेपाल डन बस्कोले अन्तिम आठको यात्रा तय गरेका हुन् ।

सोमबार सेन्ट जेभियर डिओनिया झापाले डल्फिन इंग्लिस स्कुललाई ३–० ले पराजित ग¥यो । सेन्ट जेभियर डिओनियाको जितमा आरभ आचार्य, आरोन आचार्य र प्रजय तामाङले गोल गरे । डल्फिनका युकेश तामा प्लेयर अफ दि म्याच घोषित भए । सेन्ट जेभियर डिओनिया समूह ‘बी’ बाट उपविजेता बनेको हो । यो समूहबाट सेन्ट जेभियर जावलाखल समूह विजेता बनेको छ ।

दिनको दोस्रो खेलमा भक्तपुर निस्ट र क्रेसेन्ट एकेडेमीले १–१ गोलको बराबरी खेल्दै अंक बाडेपनि समूह ‘सी’ को उपविजेता बन्यो । भक्तपुर निस्टले ३ खेलबाट ४ अंक जोड्यो । क्रेसेन्टले १ अंक जोड्यो । भक्तपुर निस्टका स्यारोन कटुवालले गोल गर्दा क्रेसेन्टका सिदाथै घलेले गोल फर्काए । सिदार्थ नै म्यान अफ दि म्याच घोषित भए ।

अर्काे खेलमा गोदावारी आवासिय स्कुलमाथि ८–० को फराकिलो जित निकाल्दै नेपाल डन बस्को समूह ‘डी’ को विजेता बनेर क्वाटरफाइनलमा पुगेको छ । नेपाल डन बस्कोको जितमा आयुष तामाङले ह्याट्रिकसहित ४ गोल गरे । सुरेश तामाङले २ तथा रोजक महर्जन र रुप्सन महर्जनले समान एक गोल गरे । नेपाल डन बस्कोले ३ खेलबाट ७ अंक जोड्यो । गोदावारी अंकविहीन हुँदै पुछारमा रह्यो ।

यो सँगै प्रतियोगिताको क्वाटरफाइनल समिकरण पूरा भएको छ । अब क्वाटरफाइनलका खेलहरु २१ डिसेम्वरबाट शुरु हुनेछ । क्वाटरफाइनलमा सेन्ट जेभियर जावलाखेल र मोर्डन इन्डियन स्कुल, नेपाल डन बस्को र सेन्ट जेभियर डिओनिया झापा, माया युनिभर्स र भक्तपुर निस्ट तथा लिटिल एन्जल्स र आयोजक सेन्ट जेभियर गोदावारीबीच प्रतिस्पर्धा हुनेछ ।

सेन्ट जेभियर स्कुल गोदावारीको आयोजनामा गत सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।