काठमाडौं (हाम्रो खेलकुद) – लिटिल एन्जल्स स्कुल हात्तीवन ललितपुर र मोर्डन इन्डियन स्कुल चोभार काठमाडौं २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगिताको क्वाटरफाइनलमा प्रवेश गरेका छन् ।

सेन्ट जेभियर स्कुल गोदावारीको खेल मैदानमा आइतबार भएको खेलमा त्रियोग हाई स्कुल धापासीलाई ८–० ले पराजित गर्दै लिटिल एन्जल्स अन्तिम आठमा क्वाटरफाइनलमा पुग्न सफल भयो ।

लिटिल एन्जल्सको जितमा स्मित रावतले ह्याट्रिकसहित ४ गोल गरे । रागव कुमार यादवले दुई गोल गर्दा दुई गोल उपहार पाएको थियो । स्मित रावत खेलको म्यान अफ दि म्याच घोषित भए । यस जितसँगै लिटिल एन्जल्स समूह ‘सी’ बाट ३ खेलमा ९ अंक जोडेर समूह विजेता बन्दै क्वाटरफाइनलमा पुगेको छ ।

अर्काे खेलमा मोर्डन इन्डियन स्कुलले पुष्पान्जली स्कुल गोदावारीलाई ४–० ले पराजित गरेको छ । मोर्डनको जितमा प्रपन्न अधिकारीले दुई गोल गर्दा दुई गोल उपहार पाएको थियो । प्रपन्न खेलको म्यान अफ दि म्याच घोषित भए । यस जितसँगै मोर्डन समूह ‘डी’ बाट ३ खेलबाट ७ अंक जोडेर क्वाटरफाइनलमा पुगेको छ ।

यस्तै आयोजक सेन्ट जेभियर स्कुल गोदावारीले विद्या संस्कार स्कुललाई २–० ले पराजित गरेको छ । सेन्ट जेभियरको जितमा सन्देश टुडुले गोल गर्दा एक गोल उपहार पाएको थियो । सन्देश टुडु खेलको म्यान अफ दि म्याच घोषित भए ।

सेन्ट जेभियर स्कुल गोदावारीको आयोजनामा गत सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।

समूह ‘ए’ बाट माया युनिभर्स एकेडेमी तनहुँ समूह विजेता र आयोजक सेन्ट जेभियर गोदावारी समुह उपविजेता बनेको छ । यस्तै समूह ‘बी’ बाट सेन्ट जेभियर जावलाखेल यसअघि नै क्वाटरफाइनलमा पुगिसकेको छ ।