काठमाडौं (हाम्रो खेलकुद) – माया युनिभर्स एकेडेमी तनहुँले २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगितामा फराकिलो जित निकालेका छन् ।

सेन्ट जेभियर स्कुल गोदावारीको खेल मैदानमा शनिबार भएको खेलमा माया युनिभर्सले आदर्श विद्या मन्दिरमाथि ११–० को फराकिलो जित निकालेको हो ।

मायाको फराकिलो जितमा इवास विकले ह्याट्रिकसहित ४ गोल गरे । अमिर दुराले २ तथा अंकित अछामी, सफल चेपाङ, विवेक परियार र मन्जिल श्रेष्ठले समान एक गोल गरे । एक गोल उपहार पाएको थियो ।

मायाका इवास विक प्लेयर अफ दि म्याच घोषित भए । मायाको यो दोस्रो जित हो । दोस्रो जितसँगै मायाको तीन खेलबाट ७ अंक पुगेको छ । पराजित आदर्शले तीन खेलबाट अंकको खाता खोल्न सकेको छैन ।

अर्काे खेलमा सेन्ट जेभियर स्कुल डिओनिया झापाले विलियम पब्लिक स्कुल सुनाकोठी ललितपुरलाई ४–१ ले पराजित गरेको छ । सेन्ट जेभियरका आरभ आचार्यले ह्याट्रिक पूरा गर्दा स्वरुप पराजुलीले एक गोल थपे ।

विलियमका विशाल ब्लोनले एक गोल फर्काए । सेन्ट जेभियरका आरभ प्लेयर अफ दि म्याच घोषित भए । सेन्ट जेभियर डिओनियाको यो पहिलो जित हो । सेन्ट जेभियर डिओनियाको दुई खेलबाट ४ अंक छ । विलियमको यो लगातार तेस्रो हार हो ।

दिनको पहिलो खेलमा नेपाल डन बस्को स्कुल लुभु ललितपुर र मोर्डन इन्डियन स्कुल चोभारले १–१ गोलको बराबरी खेलेका छन् । डन बस्कोका सुरेश तामाङले गोल गर्दा मोर्डनका प्रपन्न अधिकारीले गोल फर्काए । डन बस्कोका रोजक महर्जन प्लेयर अफ दि म्याच घोषित भए ।

सेन्ट जेभियर स्कुल गोदावारीको आयोजनामा गत सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।