काठमाडौं (हाम्रो खेलकुद) – आयोजक सेन्ट जेभियर स्कुल गोदावारी ललितपुर र लिटिल एन्जल्स स्कुल हात्तीवन ललितपुरले २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगितामा फराकिलो जित निकालेका छन् ।

सेन्ट जेभियर स्कुल गोदावारीको खेल मैदानमा शुक्रबार भएको पहिलो खेलमा सेन्ट जेभियरले आदर्श विद्या मन्दिर (एभीएम) लाई ८–० को भारी अन्तरले पराजित गरेको हो ।

सेन्ट जेभियरको जितमा सन्देश टुडुले ह्याट्रिकसहित ७ गोल गरे । सुशान्त पान्डले एक गोल थपे । सन्देश नै खेलको प्लेयर अफ दि म्याच चुनिए ।

दिनको दोस्रो खेलमा सेन्ट जेभियर जावलाखेल र सेन्ट जेभियर स्कुल डिओनिया झापाले गोलरहित बराबरी खेल्दै अंक बाँडेका छन् । सेन्ट जेभियर स्कुल डिओनिया झापाका आरोन आचार्य प्लेयर अफ दि म्याच घोषित भए ।

दिनको तेस्रो तथा अन्तिम खेलमा लिटिल एन्जल्सले क्रेसेन्ट एकेडेमी गोदावारीलाई ७–० ले पराजित गरेको छ । लिटिल एन्जल्सको जितमा स्मित रावत, आयुषमान थापा र स्वर्णिम घिमिरेले समान दुई तथा रागव कुमार यादवले एक गोल गरे । स्वर्णिम घिमिरे प्लेयर अफ दि म्याच चुनिए ।

सेन्ट जेभियर स्कुल गोदावारीको आयोजनामा गत सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।