काठमाडौं (हाम्रो खेलकुद) – मोर्डन इन्डियन, विद्या संस्कार र सेन्ट जेभिएर स्कुल २५औं संस्करणको फादर मोरान स्मृति विद्यालय स्तरीय आमन्त्रण फुटबल प्रतियोगितामा विजयी भएका छन् ।

सेन्ट जेभियर स्कुल गोदावारीको खेल मैदानमा मंगलबार भएको पहिलो खेलमा मोर्डन इन्डियन स्कुल चोभारले गोदावारी आवासिय स्कुल गोदावारीलाई ५–० को भारी अन्तरले पराजित गरेको छ । मोर्डनको जितमा प्रपन्न अधिकारी र आरोस विलास पन्तले समान दुई गोल गरे । जेम्स राउतले एक गोल थपे । मोर्डनकै जोन राउत प्लेयर अफ सद म्याच घोषित भए ।

दिनको दोस्रो खेलमा विद्या संस्कार जोरपाटीले आदर्श विद्या मन्दिर उच्च माध्यमिक स्कुललाई ४–० ले पराजित गरेको छ । विद्या संस्कारको जितमा प्रखर केसी, रोवेन श्रेष्ठ, सुवास तामाङ र श्रीशान्त योगीले समान एक गोल गरे । विद्या संस्कारका सुवास तामाङ प्लेयर अफ दि म्याच घोषित भए ।

दिनको तेस्रो तथा अन्तिम खेलमा सेन्ट जेभियर स्कुल जावलाखेलले डल्फिन इंग्लिस माध्यमिक विद्यालयलाई ६–१ ले पराजित गरेको छ । सेन्ट जेभियरको जितमा अस्टिन खनाल एक्लैले ४ गोल गरे । संगित तामाङ र प्रदयोत पोख्रेलले समान एक गोल गरे । डल्फिनका उत्सव सिलवालले एक गोल फर्काए । सेन्ट जेभियरका अस्टिन खनाल प्लेयर अफ दि म्याच घोषित भए ।

सेन्ट जेभियर स्कुल गोदावारीको आयोजनामा सोमबारबाट सुरु भएको प्रतियोगितामा विभिन्न १६ विद्यालयको सहभागिता रहेको छ । प्रतियोगिता २६ डिसेम्वरसम्म चल्नेछ ।