काठमाडौं (हाम्रो खेलकुद) – मान बहादुर श्रेष्ठ र दिल सुनार तथा कोपिला उप्रेती र कमला पुनकाे जाेडी एसियन सेन्ट्रल जोन सिनियर पुरुष र महिला बिच भलिबल च्याम्पियनसिपका लागि छनाेट हुन सफल भएका छन् ।

नेपाल भलिबल संघले मंगलबार गरेकाे अन्तिम छनाेट खेलमा जित निकाल्दै उनीहरु छनाेट हुन सफल भएका हुन् । एसियन सेन्ट्रल जोन सिनियर पुरुष र महिला बिच भलिबल च्याम्पियनसिप पुस दोस्रो सातादेखि बंगलादेशस्थित कक्स बजारमा पुस ११ देखि १६ गतेसम्म हुँदैछ ।

कीर्तिपुरस्थित बिच भलिबल कोर्टमा मंगलबार भएको अन्तिम छनोट खेलसँगै बिच भलिबल च्याम्पियनसिपमा समान एक–एक पुरुष र महिला टोलीको टुंगाे लागेकाे हाे ।

पुरुषतर्फ विभागीय त्रिभुवन आर्मी क्लबका मान बहादुर श्रेष्ठ र दिल सुनार तथा महिलातर्फ नेपाल पुलिस क्लबकी कोपिला उप्रेती र कमला पुन छनोट हुन सफल भएकी हुन् ।

पुरुषतर्फ विभागीय त्रिभुवन आर्मी क्लबमा मान बहादुर श्रेष्ठ र दिल सुनार तथा महिलातर्फ नेपाल पुलिस क्लबकी कोपिला उप्रेती र कमला पुन छनोट हुन सफल भइन् ।

प्रतियोगिताको अन्तिम छनोटमा मंगलबार पुरुषतर्फ मान बहादुर र दिलको जोडीले एपिएफका राज कुमार निरौला र लक्ष्मण रानाको जोडीलाई २–० को सोझो सेटमा हराउन सफल भयो ।

पहिलो सेटमा २१–१२ को सहज जित निकालेको यो जोडीले दोस्रो सेटमा २१–१६ को जित निकाल्न सफल भयो । खुल्ला छनाेटमा पनि मान र दिलकाे जाेडीले लक्ष्मण र राज कुमारकाे जाेडीलाई पराजित गरेकाे थियाे ।

महिलातर्फ कोपिला र कमलाको जोडीले निरुता ठगुन्ना र रेश्मा भण्डारीको जोडीलाई २१–११ र २१–१९ को सेटमा हराउँदै बिच भलिबलको लागि छनोट हुन सफल भयो । खुल्ला छनाेटमा पनि काेपिला र कमलाकाे जाेडीले रेश्मा र निरुताकाे जाेडीलाई पराजित गरेकाे थियाे ।

संघले गत कात्तिकमा गरेको खुल्ला छनोटबाट शीर्ष दुईमा रहेका टोलीलाई बन्द प्रशिक्षणमा राखेको थियो । यि दुई टोलीबीच एक साताअघिबाट प्रशिक्षण शुरु भएको थियो ।

सिनियर पुरुष र महिला बिच भलिबल च्याम्पियनसिप बंगलादेशको कक्स बजारमा पुस ११ देखि १६ गतेसम्म हुँदैछ । सहभागी टोली र खेल तालिका सार्वजनिक भइसकेको छैन ।