काठमाडौं (हाम्रो खेलकुद) – बंगलादेशको ढाकामा पुस पहिलो सातादेखि आयोजना हुने काभा यू२३ पुरुष भलिबल च्याम्पियनसिपको खेल तालिका सार्वजनिक भएको छ ।

सार्वजनिक भएको तालिका अनुसार नेपालले उद्घाटन खेलमा आयोजक बंगलादेशसँग खेल्नेछ । सोही दिन किर्गिस्तान र श्रीलंकाबीच प्रतिस्पर्धा हुनेछ । यो खेल ७ पुसमा हुनेछ ।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता रहेको छ । सहभागी टोलीले राउन्ड रोविन लिगको आधारमा प्रतिस्पर्धा गर्नेछ । नेपालले राउन्ड रोविन लिगको दोस्रो खेलमा ८ पुसमा श्रीलंकासँग तथा ९ पुसमा किर्गिस्तानसँग खेल्नेछ ।

चार टोलीको मात्रै सहभागिता रहेकाले सबै टोली सेमिफाइनलमा पुग्नेछ । सेमिफाइनल १० पुसमा हुनेछ । फाइनल ११ पुसमा शुनेछ । यसअघि ५ देखि १२ पुससम्म हुने भनिएपनि कम टोलीको सहभागिताका कारण च्याम्पियनसिपको समयावधि छोटिएको छ ।

च्याम्पियनसिपका लागि नेपालले १४ सदस्यीय अन्तिम टोली घोषणा गरिसकेको छ ।त्रिपुरेश्वस्थित राष्ट्रिय खेलकुद परिषद (राखेप) को कभर्डहलमा झन्डै १ महिना भएकाे बन्द प्रशिक्षणमा रहेका २० जनाबाट मुख्य प्रशिक्षक जगदिश प्रसाद भट्ट र प्रशिक्षक भरत यादवको टोलीले अन्तिम १४ सदस्यीय टोली घोषणा गरेको हो ।

अन्तिम टोलीमा युवा सेटर सुवास कुँवरसँगै गोविन्द टमाटा, तेज नाथ, सुरेन्द्र भाट, प्रेम प्रसाद गौतम र विशाल भण्डारीले अन्तिम टोलीमा स्थान बनाउन सकेनन् । टोलीसँग राष्ट्रिय खेलकुद परिषद् (राखेप) अन्तरगत भलिबलका मुख्य प्रशिक्षक प्रज्वल बहादुर सिंह पनि हुनेछन् ।

अन्तिम १४ सदस्यीय टोली
धिरोज कुमार बस्नेत, रवि केसी, सन्तोष खत्री, अर्जुन नेपाली, रुप बहादुर गुरौ, बिष्णु बस्नेत, सफल विक, सन्तोष महता, मनिष मानन्धर, हेमन्त मल्ल, वेद प्रकाश जोशी, सम्राट भण्डारी, गौरव पाण्डे र भीम राज गुरुङ