काठमाडौं (हाम्रो खेलकुद) –विश्व पारा तेक्वान्दो ग्रान्ड प्रिक्स फाइनल (जि १०) मा सहभागी २ खेलाडीसहित ३ सदस्यीय नेपाली टोली सोमबार स्वदेश फर्किएको छ ।

डिसेम्बर ८ देखि १० तारिखसम्म साउदी अरबियाको रियादमा भएको प्रतियोगितामा के–४४ क्याटगोरीअन्तर्गत महिला ५२ केजीमुनि सृर्जना घिसिङ र ५७ केजीमुनि पलेशा गोबद्र्धनले प्रतिस्पर्धा गरेका थिए ।

रियादमा बिहीबार राति भएको फाइनलमा विश्व वरीयताको शीर्ष स्थानमा रहेकी टर्कीकी क्याभडर मेरयेम बेटुललाई १२–० अंकका आधारमा पराजित गर्दै ऐतिहासिक स्वर्ण जितेकी थिइन् ।

त्यसअघि सृजनाले क्वाटरफाइनलमा विश्व वरीयताको दोस्रो स्थानमा रहेकी मेक्सिकोकी जेसिका क्वीजानोलाई ८–७ तथा सेमिफाइनलमा तेस्रो वरीयताकी ब्राजिली खेलाडी क्रिष्टियन नासिमेन्तोलाई १५–१३ अंकका आधारमा हराएर फाइनलमा पुगेकी थिइन् ।

नेपाली पारा तेक्वान्दोले पहिलोपटक ग्राण्ड प्रिक्समा फाइनल खेलेको हो । यो ऐतिहासिक स्वर्णसँगै सृजना पारा तेक्वान्दोको आफ्नो तौल समूहमा सातौ वरियतामा उक्लनेछिन् । यसअघि उनी १४औं स्थानमा थिइन् । सृजनाले यसअघि एसियन पारा युथ गेम्स र डब्लूटी प्रेसिडेन्ट कपमा रजत जितेकी थिइन् । यस स्वर्ण जितेसँगै सिर्जनाले १ सय अंक बटुलिन् । उनको अब ११२ अंक पुगेको छ ।

के ४४ कै ५७ केजीमूनि तौल समूहमा पारा ओलम्पियन पलेशा गोबद्र्धन पहिलो चरणमै इरानकी इव्राहिमी रोजासँग ८–२ अंकका आधारमा पराजित हुँदै क्वाटरफाइनलबाट बाहिरिइन् । टोलीको प्रशिक्षकमा अन्तर्राष्ट्रिय लेभल २ पारा तेक्वान्दो प्रशिक्षक कविराज नेगी लामा रहेका छन् ।

टोलीलाई नेपाल तेक्वान्दो संघका अध्यक्ष प्रकाशशमशेर राणा, उपाध्यक्ष भानबहादुर चन्द, सदस्य राजेन्द्र उप्रेती, सदस्य रामचन्द्र श्रेष्ठ, बागमती प्रदेश तेक्वान्दो संघका अध्यक्ष केशव पुरीलगायतले त्रिभूवन अन्तर्राष्ट्रिय विमानस्थलमा स्वागत गरे ।